నేను నిరాశను-నీ నీడను!!

ఏ వాలే ప్రొద్దులోనో నేను మిగిలేవుంటాను
ఏ రగిలే గుండెలోనో నే పాటనై పొంగుతుంటాను
కడలి మధ్య ఒడ్డుకై వెదుకుతుంటాను
కడతేరని బాదలన్నీ చుట్టు ముడితే
పొరలే ఏడుపులో భాగమౌతాను
నేను నిరాశను-నీ నీడను!!

మరపురాని ఓటమికి జైకొడుతూ 
దీపం చుట్టి చుట్టి రాలే పురుగునౌతాను
ముళ్ళ మధ్య పెరగకుండానే ఒరిగిన ఆకునౌతాను
చెరిగిన కలల వాకిట చేరి నిస్తేజమై
ఓడిపోతూ అబధ్ధాన్ని గెలిపిస్తాను
నేను నిరాశను-నీ నీడను!!

చీకటి రాతిరి నలుపు దుప్పట్లు కప్పుకొని
వెక్కిరించే భయాలను తోడు చేసుకుంటాను
తిరిగిరాని కాలాన్ని కలల మేఘాలపై పొంచి
వెక్కిరిస్తాను
నేను నిరాశను-నీ నీడను!!

ఆశలని ఊరించే కోరికలని తరిమికొడతాను
వైరాగ్యాన్ని నిండు మిత్రునిగా అక్కున చేర్చుకుంటాను
నేడు నాటిన చిన్ని ఆశను
రేపే వెలికి తీసి ఎందుకు చివురించలేదని ప్రశ్నిస్తాను
నేను నిరాశను-నీ నీడను!!