శ్రమజీవికితోడై నీవుండాలి

ఏ పరిశ్రమ శ్రమజీవి లేక
పనికి ఉపక్రమించింది?
ఏ కట్టడం శ్రమజీవి లేక
నిర్మాణం జరిగింది?
ఏ క్రొత్త ఆవిర్భావం
శ్రమజీవి లేక
ఈ ప్రపంచంలో అడుగెట్టింది?
ఏ అద్భుతమైన కల
శ్రమజీవి లేక
సాకారమై మన ఎదుట నిలిచింది?
ఏ శ్రమ
దొపిడిలేకుండా సాగింది?
ఏ శ్రమ
బెత్తంపట్టిన పెత్తందార్ల చేతిలో
కీలుబొమ్మయ్యింది?
నీవు విప్లవమంటూ
ఎర్రగుడ్డ తలకుగట్టి
తుపాకీ చేతబట్టి
అడవికి పరిగెట్టితే
ఈ బడుగుజీవి అరణ్యరోదన
పట్టణాలలో అనామకవేదన
ఎవరు తీరుస్తారు?
జాగృతి లేని జనం మధ్య
ఈ కట్టడాల వనం మధ్య
నిలిచి నిలువరించి
పోరాడు 
పడగలెత్తిన దౌర్జన్యపు
మిడిసిపాటును వడిసిపట్టి
నేలకేసి కొట్టి కొట్టి
మదపు పొట్టు తొలచి ఒలిచి
తెట్టు తేలిన స్వార్థాన్ని
తూట్లు తూట్లు పొడిచి పొడిచి
వెగటు పుట్టిన ఈ వ్యవస్థ
పుట్టల్ని పగులగొట్టి
నాజూకు పేర్లతో క్రొత్తబడిన
వెట్టి చాకిరిని
కత్తివేటుకు బలియిచ్చి
శ్రమజీవికితోడై నీవుండాలి
శ్రమజీవివై ప్రజాస్వామ్యాన్ని
మెప్పించాలి
--------------------
కార్మికదినోత్సవ శుభాకాంక్షలు