జ్ఞాపకాల్ని నిదురలేపితే

జ్ఞాపకాల్ని నిదురలేపితే
అమావాస్య ఆకాశంలో అనంతకోటి తారలల్లె
కనువిందుచేస్తున్నాయి
వెదికి వెదికి పట్టిన మిణుగురులన్నీ
ఎగిరిపోతున్నట్లు
రంగు రంగుల గోళీలన్నీ
చిన్నారి చేతినుండి జారిపోతున్నట్లు
అందకుండా కదిలిపోతున్నాయి
ఏ జ్ఞాపకాన్ని పలుకరించాలో 
తెలియక మనసు మూగవోతూంది
తెలివి మౌనం వహిస్తోంది
వెలికి రానంటున్న మరికొన్ని
అలిగిన పాపలై దాగుడు మూతలాడేస్తున్నాయి
గొంగళి పురుగు సీతాకోక చిలుకైనట్లు
మరికొన్ని చేదు అనుభవాలు
తీపి జ్ఞాపకాలుగా మెరుగయ్యయి
వెలగని మతాబులై మరికొన్ని
మనసులో నుండి మరుగయ్యయి
నిండు వసంతంలాంటి కొన్ని జ్ఞాపకాలు
కలలై వెంబడిస్తున్నాయి
దోసిట్లో నిలువని నీరై
మరికొన్ని జారిపోతున్నాయి
వెయ్యేండ్లైనా చెరిగిపోని తాళపత్రమై 
నీ జ్ఞాపకాలు మది అడుగున
పదిలమై వున్నాయి
చలిలో నులివెచ్చని దుప్పటి కప్పినట్లు
ఒంటరి ప్రయాణంలో ఒక తోడు కలిసినట్లు
ధారలౌతున్న కన్నీటిలో
ప్రపంచమంతా శూన్యమైనపుడు
నేను తోడంటూ చేయి అందించిన
నీ జ్ఞాపకాలు ఎపుడూ వెంటున్నాయి
అప్పుడప్పుడూ గతం తాలూకు జ్ఞాపకాలు తిరగేస్తాను
నేను ఎవరన్న నిజం నెమరేస్తాను
జ్ఞాపకాల పుటల్లొ మరో సశేషం చేరుస్తాను

దొరతనమణచ ఎయ్ దరువెయ్

ఎయ్ దరువెయ్
దుమ్ముపట్టి ధూళిపట్టి
నిమ్మకు నీరెత్తని తొత్తుగాళ్ళ
ఈ పొత్తుగాళ్ళ
రాక్షస రాజకీయ
నాయకుల పాలకుల
వూడ్చివేయ పూడ్చివేయ
ఎయ్ దరువెయ్!!

పొగరుతో ఒగరుతో
జనాలను గుమ్మపు జంతువులుగ
గుప్పెట బంధించిన
నేరగాళ్ళ నేతగాళ్ళ
దొరతనమణచ
ఎయ్ దరువెయ్!!

ఎకరాలకు ఎకరాలు
బొక్కెటోళ్ళ పుక్కెటోళ్ళ
డబ్బుల జబ్బుపట్టి
గబ్బుగొట్టె
మోసగాళ్ళ దొంగకోళ్ళ
పూసలదరగొట్ట బెదరగొట్ట
ఎయ్ దరువెయ్!!

కష్టాల్లో కరవులో
అలో లక్ష్మణా అని మేముంటె
లంచమంటూ పంచమంటూ
కడుపు మాడగొట్టె
ఈ కలుపుగళ్ళ కైపుగాళ్ళ
తరిమిగొట్ట తురుముపట్ట
ఎయ్ దరువెయ్!!

గొంతెండి
పొలమెండి
గుండెమండి పోతుంటె
నీటి రాజకీయలతొ
నీఛ రాజకీయాలతొ
ఇంటి ఈతకొలను లో 

పబ్బం గడుపు

వడుపుగాళ్ళ ఏపుడుగాళ్ళ
గుండెలదర
కూసమదర
ఎయ్ దరువెయ్!!

నీకెప్పటికీ నిజం కాను

ఎక్కుపెట్టిన విల్లునై నేను
లక్ష్యం చేరకుండానే లౌక్యంతో
సంభాషిస్తాను, లౌకికత్వంతో పయనిస్తాను
విలుకాని వెన్ను విరుస్తాను
నమ్మకాన్ని వమ్ము చేస్తాను
అందుకే నేను నిజం కాను
దర్పణంలో ద్వయం నేను
సామాన్య జీవనపు గరళం మ్రింగిన నేను
చిరునవ్వుల వెనుక విషపు కోరలు దాచగలను
నీవెదురైనప్పుడు నెవ్వెరపోయే ప్రేమ చూపిస్తాను
దూరమున్నపుడు నమ్మలేని మౌనమౌతాను, తత్వానికి దొరకను
నేనందుకే నిజం కాను
వెనుతిరిగి చూసుకుంటే నీ తీపి గురుతులలో నేను
మున్ముందు ఈ ఒరవడి కొనసాగుతుందని నమ్మించలేను
ఇప్పటికిప్పుడు తెరలమాటున మాయమయ్యే నేను
నీకెప్పటికీ నిజం కాను
పదునైన అభిప్రాయాలు పంచుకునే నేను
తరచి చూస్తే ఎపుడూ పాటించను
ఒకింత అబద్ధం
ఒకింత స్వార్థం
ఒకింత పైత్యం
ఒకింత స్నెహం
ఎక్కడో కొంత ప్రేమ
మరింత చపలత్వం
కలగలిసిన నేను
నీకెప్పటికీ నిజం కాను

ఐదు సంవత్సరాల ఊడిగం

ఎన్నికలో ఎన్నికలు
ఎన్ని కలల ఎన్నికలు
కల్లి బొల్లి హామీల ఎన్నికలు
కలుగులో దూరిన ఎలుకల్లా బయటకొచ్చే ఏలికలు!!
కుంగిన గుండె పై ప్రేమపూతలు 
ముద్దుల ఒలకబోతలు
వంగి వంగి నమస్కారాలు
వేల వేల న "మస్కా"రాలు
నేతల నోట చిలుకపలుకులు
బక్క చిక్కిన ముక్కి మనిషిని ఆత్మబంధువని కౌగిలించే నేతలు!!
మందుల వరదై పారే ఎన్నికలు
గొర్రెల మందలా మారే ప్రజలు
ఎన్నుకున్న ప్రజలు మూర్ఖులపాలు 
ఎందుకన్నవారు తన్నులపాలు
ప్రజస్వామ్యం మళ్ళీ మళ్ళీ నగవుల పాలు
మరణించిన వారు సైతం పాల్గొనే ఎన్నికలు
ఎవరు నకిలీయో తెలియని ఎన్నికలు
"నల్ల" నగదు బదిలీ ఎన్నికలు
ఐదు సంవత్సరాల ఊడిగంకై సమర్పించే సంపూర్ణాంగీకారం ఎన్నికలు!!

అదిగో వచ్చేదే మా ఊరు

అదిగో వచ్చేదే మా ఊరు
పేడ కళ్ళాపి చల్లిన ముంగిళ్ళు
ముంగిళ్ళలో తీర్చిదిద్దిన రంగవల్లికలు
రంగవల్లికల మధ్యలో గొబ్బెమ్మలు
గొబ్బెమ్మలపై గుమ్మడిపూలు
గడపగడపకి మామిడి తొరణాలు
పసుపు గడపల బంగారు ధగధగలు
చిరునవ్వుల పలుకరింతలు
దూరం పెరిగిన స్నేహాల తీపి కలయికలు
చిరు మందహసం చేస్తున్న బుర్ర మీసాలు
భుజం తట్టి పలుకరిస్తున్న సమ వయస్కులు
క్రొత బట్టల్లో పరుగులెడుతున్న చిన్నపిల్లలు
అవి.... సంవత్సరాలనాటి జ్ఞాపకాలు
ఇప్పుడేమో ఊరు పెరిగింది
మనుషుల మధ్య దూరం ఇంకా పెరిగింది
పలుకరింపులు దూరవాణికి పరిమితమయ్యాయి
పండుగలు దూరదర్శన్ కి కార్యక్రమాలయ్యాయి
ఊరికెళ్తే పోయినదేదో
వెదుకుతున్నట్టు
దొరికినదేదో
మనదికానట్టు
రంగులకలలేవో
ఛిద్రమైనట్టూ
నిజాల నిప్పురవ్వలు
గుండెను తాకుతున్నాయి

బంధం విలువ

నవ్వుకు
పువ్వుకు
తావికి
అల్లుకున్న బంధం విలువ తెలుసు
కడవకు
పడవకు
గొడుగుకు
నీవులేక నేనులేనన్న
అనుబంధం విలువ తెలుసు
చెలిమికి
బలిమికి
కలిమికి
వీడినప్పుడు మాత్రమే
మనసుల విలువ తెలుసు
వేకువకు
వెలుగుకు
వెన్నెలకు
చిగురిస్తున్న ఆశల 
నూతన బంధం విలువ తెలుసు

చరిత్ర పుటలపై నీ సంతకం

ఎండలో కరుగుతున్న మంచు ముక్కలాగా
పిడికిళ్ళ నుండి జారిపొయే ఇసుకలా
కళ్ళు మూసి తెరిచేంతలో
కాలం కరిగిపోతున్నది
వెలకట్టలేనిదై చెజారి పొతూంది
ఎవరి కోసం ఆగనంటూ
ఎందుకోసం అగాలంటూ
వెనక్కి తిరిగి చూసుకుంటే
పుట్టిన రొజులెన్నో గడచిపొయాయి
వగచిన రొజులన్నీ మిగిలిపొయాయి
నిముషం నిముషం
నిదురలొనే జోగితే
కలతల్లోనే మిగిలితే
ఇరవై లో అనుకున్నవి
అరవై లో చేయలవా?
మళ్ళీ చేద్దామంటూ
మతిమరపు పేరు చెప్పి
విధివ్రాత పేరు చెప్పి
సమయం కరిగించకు
నీ విలువను తరిగించకు
కాలు చేయి ఆడనివారు
అలుపెరుగక శ్రమిస్తున్నారు
ప్రపంచ ప్రఖ్యాతి పొందుతున్నారు
నీవెందుకు అందులో అంతో ఇంతో కొంతో
సాధించలేవు?
కాలం నిన్ను శాసింపక ముందే
నీవు ప్రణాళిక రచించు
చరిత్ర పుటలపై నీ సంతకం లిఖించు

ఆకాశంలో సగం ఎక్కడ?

ప్రేమ పంచడం తెలియక
మనసు గెలవటం తలంచక
అర్థం చేసుకుని ఆరాధించలేక
మూర్ఖంగా ఆస్వాదించాలనుకున్నారు
క్షణికపు కోర్కెలతో 
పైశాచికత్వం దుర్మార్గత్వం కలబోసిన
జుగుప్సాకరమైన దారులెన్నుకున్నారు
ఆమ్ల దాడులు, అకృత్యాలు, అపహరణలు
నిర్వచింపలేని అపరాధాలతో
ప్రకృతిని శాసించామనుకొంటున్నారు
నీచప్రవృత్తిని భరించమంటున్నారు
ఆకాశంలో సగం ఎక్కడ, భూమిపై విలువే లేదిక్కడ
ప్రకృతి తిరగబడితే
ప్రపంచం నాశనమే
విశృంఖల బేహారులకు మరణశాసనమే
కామ ప్రకోపకుల మధాంధ తత్వాన్ని
అణచటానికి ఈ స్నిగ్ధ మనోహర సౌందర్యమే
శక్తిస్వరూపిణియై మృగతృష్ణను
కడతేరుస్తుంది, కాలరాస్తుంది
ప్రకృతే తనను తాను మలచుకొంటూ
ఓ విప్లవంగానో
ఓ విధ్వంసంగానో
ఓ సంఘటిత శక్తిగానో 
జీవుల సమతుల్యత పరిరక్షిస్తుంది

ఇది నిత్య సత్యం

ఇది సత్య కృత్యం

తరతరాలకు తెలుగు వెలుగు

పరభాషా ఒరవడిలో
తెలుగు తృణీకరింప
మనసేల ఒప్పుచున్నది
మాతృ భాష మన కంఠమ్ము వీడ
ఉనికి కోల్పోయి మూలమ్మున్గోల్పోయి
తెగిన గాలిపటమ్ము వలె 
జాతి బోవుచుండ మిన్నకుంటిమి
వంశ పారంపర్యముగ 
తెలుగు నాదరించువారు 
తరిగిపోగా
భాష మూగవోతున్నది
భావితరాలకు మరుగుకానున్నది
మాతృ భాష మధురమైన భాష 
లోకులెల్ల కొనియాడిన భాష
కథల్ కావ్యముల్
కీర్తనల్ శతకమ్ములు పురాణమ్ములు పండించిన భాష
జాతి జీవ నాడి యైన భాష
ఇట్లు రాలిపోవ తగునా
ఇట్లు అక్షర క్షరమగుట క్షమార్హమౌనా
ఆస్వాదించినన్ అరాదించినన్ 
నివేదించినన్ విభేదించినన్  
కీర్తించినన్ ప్రార్థించినన్ 
చక్కగ నొదుగు భాష తెలుగు భాష

కన్న బిడ్డ వలె కంటిపాప వలె

వెలకట్టలేని వజ్రం వలె
వేయి జన్మల ఫలము వలె
తెనుగును కాపాడుకోవలె
జాతి నొక్కటిగ నుంచు తెలుగు భాష
సంస్కృతి శాశ్వతమై నుంచు మన మాతృ భాష
భాషలోన భావమున్నది
భావములోన బంధమున్నది
బంధములోన భవితయున్నది
భవితలోన సౌభాగ్యమున్నది
భావ బంధ భవిత సౌభాగ్యముల 
పరివృత్తమై భాష యున్నది
వారధిగా మనమున్నాము
తెలుగు వెలుగును తరతరాలకు అందిద్దాం

సమైక్యం ఎక్కడ దాక్కుంది?

సమైక్యం ఎక్కడ దాక్కుంది?
ఆ బాబు ఈ బాబు ఏమైయ్యారు?
ఆడకుండానే ఓడిపోవడం ఇదె, కాదా?
మనం ఆరంభ శూరులం కాదా?
ఉద్యమ వీరులెక్కడ?
అప్పుడప్పుడూ దిష్టి బొమ్మలు కాల్చిన ధీరులెక్కడ?
ఆంధ్ర పౌరుషమెక్కడ?
ఆత్మ గౌరవమెక్కడ?
సీమ చీమునెత్తురెక్కడ?
మీసం మెలిపెట్టడమెక్కడ?
తొడలు గొట్టటమెక్కడ?
జన వాహినులెక్కడ?
మానవ హారాలెక్కడ?
ఉద్యమం ముగిసిందంటారేం?
తట్టా బుట్టా సర్దెశారేం?
సభ ఆమోదిస్తే సరిపోతుందా?
పీడా పోయిందని అన్ని పక్షాలూ అప్పుడే నాకేంటి అంటున్నయేం?
పదవులెలా పంచుకోవాలని తపన పడ్తున్నాయేం?

మొదటి పౌరుడు మకిలిపట్టాడేం?

మౌన ప్రధానులు ఇప్పుడు మాత్రం గొంతెత్తారేం?
పెద్దమ్మ చిన్నమ్మల నాటకాలు ఇంకా చూసి తరిస్తారా?
న్యాయస్థానంలో పొరాడలేరా?
రాజకీయ అపహాస్యం ఆపలెరా?
రాజ్యాంగాన్ని బంతాట ఆడుకున్న హీనులను మట్టి కరిపించలేరా?
చెల్లని ముద్ర వెయించుకున్న కాగితం మనల్ని శాసిస్తుందా?
యెవత్తో విసిరేస్తే యెవరో తెస్తే మనం భరించాలా?
శతాబ్దాల బానిసత్వం ఇంకా పోలేదా?
వెలుగు కిరణం విచ్చుకుంటున్నది చూడలేరా?
సమైక్యరణంలో పొరాడుతాం లేవండ్రా!!

మనసిచ్చిన మాట

ఏకువ జాము సూరీడు ఎర్రాని సిగ్గద్దినట్టు
సిగురాకు లేతదనం వొల్లంత వొంపినట్టు
మబ్బుల్లొ తారాడు సెందురూడి సల్లదనం సూపుల్లొ నింపినట్టు
నగవులోన  మల్లెలేవో గుప్పిళ్ళతో మత్తు గుమ్మరించినట్టు
పాట కడదామంటె పలుకు రాకపాయ 
మాట కలుపుదామంటె మెలకువే లేకపాయ
రేపన్న చప్పాల
ఎట్టైన చప్పాల 
మనసులోనీ   మాట
మనసులో    నీ     మాట
మనసైన  ఆ  మాట
మనసిచ్చిన  మాట

వడగండ్ల వాన

ఎంటెంట వొచ్చింది

యెదలొనా గూడుకట్టింది

గుండెనిండా రూపు నింపింది

గువ్వలా వొదిగిపొయింది

పాటలెవో పాడి నిదురబుచ్చింది

కలలన్నీ చిలిపి కతలల్లె చేసింది 

ఎండినా ఈ మోడుకు నిండైన మనసుతోనా

మల్లె తీగై అల్లుకున్నాది  

సెగ రేగుతున్న యెడారి మింద 

వడగండ్ల వాన మల్లె కురిసింది

ఉద్యమం

ఉద్యమమంటే!
అలుపెరగని  పోరాట  స్పూర్తిని  రగిల్చేది
లక్ష్యపు  దావాగ్నిని  నిలువెల్లా  నింపుకొని నిప్పులు  కక్కేది
వేల  హృదయాల  ఆక్రందనను  విప్లవ  శంఖమై  పూరించేది
వేదన  ఎందుకు?
పద  ముందుకు !
కదన  విందుకు!!
అంటూ  దిశానిర్దేశం చేసేది
క్రోధం , మోదం , ఖేదం , భేదం  ప్రక్కన  పెట్టి
పిడికిలి  బిగించి
వ్యూహాల పదును  పెంచి  
సమ భావన పంచి
నేల  నెరియలీనేలా కదం  త్రోక్కిన్చేది
ఆకాశం  త్రుళ్లిపడేలా గంభీర సింహ నాదమయ్యేది
ప్రత్యర్థుల గుండె  గుభిల్లుమనేల వేన వేల సమూహపు
సంఘటిత శక్తియై విజ్రుంభించేది
విజయం మన సొంతమయ్యేవరకు విశ్రమించనిది
ఉద్యమమంటే !!

భవిష్యత్

కనుచూపు మెరలోన కానరానిది

ముందుచూపు ఉన్నవారికి విశ్వాసం కలిగించేది

వెనుతిరిగితే మిగలినిది

ముందడుగేస్తే మనదయ్యేది

ఆశల పల్లకి కొందరికి

నిరాశల ఎండమావి మరికొందరికి

ఎంపిక మనదే

ఎదురుచూపు మనదే

ఎంచుకున్న మార్గంలో పయనిస్తే

కోరుకున్న గమ్యం చేరుస్తుంది

విశ్రమించక శ్రమతో సాధిద్దామా?

శయనించి స్వప్నంలో మిగిలిపోదామా?

ఈ గాథ

మలిసంజ మబ్బులపై నీ రూపున్గాంచి 
శిశిర ఉదయాలననుభవించు హృదయమ్ము తోడ 
జాగృతి నొసంగని జాములో జీర్ణ జీవఛ్చవమై 
నివృత్తిలేని వృత్త పరిభ్రమలో భ్రమలపాలై 
నిజం నైజం నిర్వచింప నోరురాక, 
ప్రవచించలేని ప్రబంధమై మిగిలిపొయెనీగాథ

సమైక్యం కోసం

రక్తం మరుగుతోంది
గుండె మండుతోంది
సమరానికైనా సిద్ధం
మరణానికైనా వెరువం
సమైక్యం కోసం!
రహదారులు జన ప్రవాహాలై పొంగుతుంటే
ఎలుగెత్తిన గళాలు సమర శంఖం పూరిస్తుంటే
లావా ప్రవాహమైతాం సమైక్యం కోసం !!
విప్లవమై రగిలిపోదాం
రణన్నినాదం వినిపిద్దాం
విద్యార్థులు,ఉపాధ్యాయులు,కార్మికులు,కర్షకులు
మహిళలు,వృద్ధులు,పెద్దలు,పిల్లలు
జన రేణువులై ఉద్యమ తీరాల్నినింపేస్తుంటే
స్వార్థ రాజకీయ శక్తుల నిర్ణయాలు తుడిచిపెట్టుకు పోతాయి
కదం త్రొక్కుతున్న సమైక్య సైనికుల కాళ్ళ క్రింద
పీలికలై పేలికలై నుజ్జునుజ్జై
ఈ నిర్ణయాలు నామరూపాలు లెకుండాపోతాయి
శిలాశాసనాలే శిధిలమయ్యాయి
నియంతలే ఉద్యమాలనెదిరించలేక ఉరేసుకొన్నారు
మీరెంత?, కాలికంటిన బురందంతా?
చేతికంటిన మసంతా??

ఆంధ్రదేశం

అరవై వసంతాల సమైక్యం
ఆరిపోతుంటే చూస్తూ మిగిలి పోవాలా ?
తల, మొండెం వేరు చేసి తెలివైన విభజనంటుంటే
మెదడులేని పశువులాగా తలాడించెయాలా?
మిరిమిట్లు గొలిపే మెరుపులై ఆకాశాన్ని జ్వలించాలి
నిప్పుల ఉప్పెనై
ఈ శిధిల నిర్ణయాన్ని, నియంతలనూ దహించేయాలి
మనోభావాల విలువ తెలియని మూర్ఖత్వాన్ని
కూకటి వ్రేళ్ళతో పెకిలించాలి
రాయలు ఏలిన రతనాల సీమ, మనది
కోటి రతనాల వీణ తెలంగాణ, మనది
ఆంధ్రులకు అస్తిత్వం కలిగించిన ఆంధ్ర, మనది
వాడెవ్వడు? వీడెవ్వాడు?
పంచేస్తాం, త్రుంచేస్తామంటూ
విలువలేని పలుకులు ఒలుకుతున్న
ఆ...కులుకుతున్న రాబందుల వలువలూడగొట్టు
పంచుతామంటే పళ్ళు రాలగొట్టు
తెలుగు తల్లి గుండె గాయమే చేస్తుంటే
జన వాహిని జగమెల్ల నినదిస్తుంది
సహస్ర కోటి గళాలు చేరి కుఠిల రాజకీయానికి చరమ గీతం పాడేస్తాయి
కేంద్రాలు, రాష్ట్రాలు, చట్టాలు, ఆ సభలు, ఈ సభలు
హృదయనుబంధాల్ని చెరపలేవు
ఈ మట్టి , ఈ నీరు, ఈ గాలి మనది
ఎవరూ పునర్నర్మించలేరు
మరియెవరు విభజించలేరు
తెలుగు జాతి పూజించు ప్రదేశమొకటే
ఆంధ్ర దేశమదొకటే 
ప్రజల అభీష్టానికి వ్యతిరేకమైన పాలనా,పాలకులు మనలేరు
చరిత్రలో ద్రోహులై మిగిలిపోతారు
సమైక్య ప్రభంజనంతో మూగవోతారు
మా తెలుగు తల్లికీ మల్లె పూదండ!
మన తెలుగువారికీ సమైక్యమే అండ!!

మన పత్రికలు

పత్రికల నిండుగా వెండి తెర బంగారు వార్తలు
వెలుగు నోచని జీవితాల నిలువెత్తు భంగిమలు
వెల ఎక్కువ దుస్తులతో నిండిన ఛాయా చిత్రాలు
వెల కట్టలేని శృంగార పాఠాలు
ఆది అంతం లేని చక్కని కథలు
తలకెక్కని ప్రశ్నలకి త్రుళ్ళిపడే సమాధానాలు
సాహిత్య స్వరూప స్వభావాలే మరిచాము
పఠనా సామర్థ్యం నీరసిస్తోంది
బుల్లితెర మాయ దహిస్తోంది
కాపాడుకోవాలి తీయనిన తెలుగుని
మన సాహిత్యాన్ని
మన బాష నిండుదనాన్ని
ప్రతుల విలువకన్నా
వ్రాతల విలువ పెరగాలి
పత్రికలు తెలుగుకు వెలుగు వేదికలై వర్ధిల్లాలి

-----------------------------------------------------
పత్రికలు వినోదం వైవిధ్యం పంచుతున్నా
కాని అంతర్లీనంగా భాషని, సాహిత్యాన్ని వ్యాపింప చేస్తున్నాయి
వాటి రాయభార భాద్యతలని గుర్తెరగాలి

వెలుగు - చీకటి

చీకటి తో పోరాటం
వెలుగు కై ఆరాటం
తరం తరం ఈ యుద్ధం నిరంతరం
వెలుగు రేఖలతో మన ప్రపంచం నిండాలంటే
స్వేదబిందువుల ఉప్పెన తప్పనిసరి
అలుపెరుగక శ్రమించితే మరి
అన్ని కష్టాలు సలాం అంటూ
మనముందు గులామౌతాయి

జీవన శైలి

మూడు వన్నెల జండా ఎగురవేసినప్పుడు
 ఉద్వేగంగా వుంటుంది
భారతీయుడినైనందుకు గర్వంగా వుంటుంది
దేశం కోసం ఏదైనా చేయాలన్పిస్తుంది
కాని అది ఆ ఒక్క క్షణమే
ఆలోచనలన్నీ మారిపోయే మరు నిమిషమే
దేశం కోసం సమయం లేదు కేటాయించడానికి
చలన చిత్రాలతో సరిపోయింది ఈ వారంతం మరి
బుల్లి తెర ధారావాహికలు
వార్తల పరంపరలు
అంతర్జాలం మహేంద్రజాలం
వేశాయి విలువైన కాలానికి గాలం
నాగరికత చెదలు పట్టింది
జీవిత శైలి భ్రస్టు పట్టింది
త్రుప్పు పట్టిన ఈ మనిషి తీరు మారాలి
ఆకలి చావులు ఒక వైపు
పుష్టి భోజనాలతో రోగిష్టులు మరో వైపు
బాలికా పసికందుల హత్యలు ఒక వైపు
ఆడది ఆకాశం లో సగం అనడం మరో వైపు
పులుల సంరక్షణ కాంక్షిస్తారు కొందరు
పులులై జనం మీద ఎగబడతారు మరికొందరు
అవినీతి నిత్య హారతి భారత మాతకి
కుళ్ళు రాజకీయం మణిహారమయ్యింది భారతావనికి