కాస్త కళ్ళు తెరువు బాబు

ముందుకెళ్తున్నానంటూ పరుగులెడుతున్నావు
మరి వెంట ప్రజలున్నారా చూసుకో బాబు
అతి వేగం ప్రమాదకరం
ఫలితమివ్వని సంస్కరణలు పరిహాసమౌతాయి బాబు

చేసేస్తున్నామంటే సరిపోదు
ప్రజల అవసరం తీరిందా అనేదే ప్రశ్న
పథకాలు ప్రకటించడంతోనే బాధ్యత పూర్తవ్వదు
పేదల కడుపునిండుతున్నదా విలువెంచుకో బాబు

సహచరులను వెనెకేసుకురావడం కనిపిస్తూనే ఉంది
స్వచ్ఛత పై పడే మచ్చల జాబితా పెరుగుతూనే ఉంది
క్రొవ్వు పట్టిన మద గజాల కంపు పెరుగుతూనే ఉంది
స్వచ్చ ఆంధ్రప్రదేశ్ జాబితాలో మనుషుల్ని మరి మనసుల్ని
కాస్త చేర్చుకో బాబు

పిల్లి కళ్ళు మూసుకుని...అన్నట్లు
ప్రతిపక్షం మీదనే అంతా రుద్దేస్తే సరిపోదు
మీకు అంటుతున్న మసి మాసిపోదు
కాస్త కళ్ళు తెరువు బాబు

అద్భుతమైన అలోచనలుంటేనే సరిపోదు
ఆచరణలో కూడ కనిపిస్తేనే
చివరి వరకూ కొనసాగిస్తేనే
ప్రజల మన్ననలు అందుతాయి బాబు

ఓ వడ్డీల మహరాజు

పిలిస్తే డబ్బులిస్తామంటూ
రోజువారీ వడ్డీ ఇస్తూ రోజు గడుపుకోమంటూ
అప్పులిచ్చి గుప్పెడంత ఆశనిచ్చాడు
ఓ వడ్డీల మహరాజు

భూమి పత్రం కావాలంటున్నాడు
పుస్తె పసిడి తెచ్చివ్వమంటున్నాడు
దొరికిన కొద్దీ దోచుకుంటున్నాడు
అవసరం తీర్చమంటున్నాడు
ఈ వడ్డీల మహరాజు

పొరపాటు తెలిసినా
గ్రహపాటు తప్పలేదు
అప్పు తీర్చలేక
తప్పు సరిచేయలేక
ఇల్లమ్మి భూములమ్మి
కట్టు బట్టలతో బయటికీడ్చాడు
ఆ వడ్డీల రారాజు!!
లెక్కలు గుక్క తిప్పుకోకుండా
చెబుతున్నడీరోజు
అప్పు నిప్పై తలమీద కూర్చుంటే
పగబట్టిన త్రాచై మీదకురుకుతున్నాడు వడ్డీల రారాజు

ఉసురు తీసుకోకముందే
ఈ కోరలకు బలికాకముందే
గుండెల్లోని బాధ కంఠంలో పొలికేకవ్వగ తిరగబడు
మగ్గుతున్న తలవొగ్గుతున్న  ప్రజలని చైతన్య పరుచు
సమాజం నుండి వెలివేయి ఈ రక్త పిశచుల్ని
స్వంత కుటుంబమే ఈసడించుకోవాలి ఈ మానవ మృగాలని
ఈ కౄరమైన ఆటకి అదే ముగింపు తమ్ముడూ

నీ ప్రేమను కొంచెం కొంచెం రుచి చూపిస్తూనే ఉంది....

చిరుగుల జ్ఞాపకాలలో
చివరికి మిగిలింది
చనువుతో తాకిన
నీ మది గానమే

ఎండల ఈ వేసవి వెంటే ఉంది
కబురులు చెప్పక
కర్కశపు క్షణాలు తెచ్చింది
గుండెను కోత కోసింది

ఎరగా నను వేసి
నిన్ను కాజేసింది
రంగుల దుప్పటి నాపై కప్పి
కాలం కనుమరుగయ్యింది

కాలాలను దాటి
కలలు వెంటాడుతున్నాయి
తలుపులు మూసిన నీ తలపులపై వ్రాసిన
విరహపు కవితలు
రెప్పకు చెప్పక
చప్పున గుండెలోతుల్లోకి ఇంకిపోయాయి

మన ఇళ్ళ మధ్య అల్లుకున్న
సన్న జాజి తీగ మాత్రం
గుప్పెళ్ళతో పూవులు గుమ్మరిస్తూ
నీ ప్రేమను కొంచెం కొంచెం రుచి చూపిస్తూనే ఉంది

నిర్లజ్జగా మన పత్రికలూ, మాధ్యమాలు

అక్షర బానిసత్వం అణువణువునా నిర్వచిస్తూ
కలానికి సంకెళ్ళు వేసి
స్వేచ్ఛా భావాలని అణిచివేసి
రాజకీయాలకు లొంగిపోతూ
నిర్లజ్జగా మన పత్రికలూ, మాధ్యమాలు

స్వంత ప్రచారానికి వాడుకుంటూ
రాజకీయ నాయకుల పుత్రికలై
సొంత బాక ఊదుకునే వేదికలై
స్వేచ్ఛను కాలదన్ని అచేతనమై
నిర్లజ్జగా మన పత్రికలూ, మాధ్యమాలు

నిజాన్ని పాతరేసిన
వక్ర ధోరణుల
వికృత వ్రాతల
కర దీపికలు - పత్రికలు
బుల్లితెర స్వార్థ వాహికలు - మాధ్యమాలు
నిర్లజ్జగా మన పత్రికలూ, మాధ్యమాలు

నాయకుల కొమ్ము కాస్తూ
వారి పంచనే పడగలు పెంచుకుంటూ
అధికారానికి అర్ధాంగిగామారి
వార్తలకు బదులు కట్టుకథలు అల్లేస్తూ
నిర్లజ్జగా మన పత్రికలూ, మాధ్యమాలు

ప్రజలకు నిక్కచ్చి సమాచారమందించాల్సిన
ప్రధాన బాధ్యతను విస్మరించి
వ్యాపార సూత్రాలను వల్లెవేస్తూ
నికృష్ట రాజకీయాలు వంటబట్టి
బుల్లితెరలపై ప్రజలకు అబద్ధాలు నూరిపోస్తూ
నిర్లజ్జగా మన పత్రికలూ, మాధ్యమాలు

ప్రజలకు తెలుసు ఏ పత్రిక ఎవరికి కొమ్ముకాస్తుందో
ప్రజలకు తెలుసు ఏ మాధ్యమం ఎవరిని ఆకశానికెత్తేస్తుందో
ఎవరు భ్రమలో ఉన్నారు?
ఎవరు నీచ సంస్కృతిని ఎగదోస్తున్నారు?
నిర్లజ్జగా మన పత్రికలూ, మాధ్యమాలు

తగులబెట్టండి ఇటువంటి పత్రికల్నీ మాధ్యమాల్ని
విషసంస్కృతిని ప్రజలపై రుద్దకుండా
తిరిగి ఈ సర్పాలు మొలవకుండా
సమాజాన్ని శాసిస్తున్నామనుకోకుండా
తగిన శాస్తి చేయండి
ఎంత  నిర్లజ్జగా మన పత్రికలూ, మాధ్యమాలు?!!

దాశరధి తెలుగువారి సాహిత్య రథ సారధి

దాశరథి, తెలుగువారి సాహిత్య రథ సారధి
ఎనబది ఏండ్ల సాహితీ వారధి
విలక్షణ రచనల పెన్నిధి
తన పయనంలో
తెలంగాణ మాండలీకంతో
తెలుగు మోదుగుపూలు పూయిస్తూ
తెలంగాణ పోరాటాల్ని
అక్షరీకరిస్తూ
తెలుగు సాహిత్య పరిమళాలకు
నిత్యశోభనిస్తూ
చిల్లరదేవుళ్ళ సమాజాన్ని
కళ్ళకు కడుతూ
నిజాము నెదిరించి
జనపదమునకు అక్షరజీవంపోస్తూ 
కావ్యాలను అనువదిస్తూ
దివికేగిన రంగాచార్యులకు
ఇది మా తెలుగు వారి భాష్పాంజలి

కుళ్ళిన నాయకులని సంతల్లో కొనేస్తూ

కుట్రలు కుతంత్రాల
నాయకులు
కుళ్ళబొడుచుకుంటున్న వైనం
కళ్ళారా చూస్తున్నాం
రోతపనుల ఈ రోగగ్రస్తులని
పాలించరా అని గద్దెనెక్కిస్తే
నిక్కి నీలిగి
ప్రజా పాలన వదిలేసి
రహదారి పై కుక్కల్లాగ
పోట్లాడుకుంటూ
నక్క జిత్తుల తెలివి తేటలన్నీ
ఒకరిపై మరొకరి నాశనానికి
ఉపయోగిస్తూ
కట్టల కట్టలు డబ్బులు
వెదజెల్లుతూ
ప్రజలను వెర్రి వెధవల్ని
చేసే ప్రయత్నంలో విజయం 
సాధించినట్లు విఱ్ఱవీగుతున్నారు
కృతజ్ఞతకు బదులు
ప్రజలకు కృతఘ్నులుగా మారుతున్నారు
విచక్షణలేని వికృతత్వాన్ని 
తలకెక్కించుకున్నారు
విడిపోయినా
తమ ప్రాంత బాగోగులు చూసుకోక
కుఠిల రాజనీతులపై
సమయం వెచ్చిస్తూ
కుళ్ళిన నాయకులని సంతల్లో కొనేస్తూ
సాగే ఈ దుష్టయజ్ఞం ఎన్నాళ్ళు?
దొరికిన దొంగలు కొందరే
దొరకని దొంగల దాగుడుమూతలు మరెన్నాళ్ళు?

వచ్చిందిర తెలంగాణ!!

జన గర్జన
పెల్లుకుబికి
పోరాటం
నింగికెగసి
ఉడుకుడుకు నెత్తురుల
ఉరుకులెత్తి
వచ్చిందిర తెలంగాణ!!

పిడికిలి బిగించి
ప్రాణం తెగించి
గళ హోరుగ
జన వేదన
రగిలించిన
అగ్గి గోళమై
శివాలెత్తగ
వచ్చిందిర తెలంగాణ!!

బలిదానపు
విద్యార్థులు
అలుపెరగని
ఉద్యోగులు
ఉద్యమమై సాగగ
కొత్త ఉదయమై
వచ్చిందిర తెలంగాణ!!

ఒక్క తాటిపై
ఒక్క రూపమై
సంధించిన బాణమై
నిదురించని నినాదమై
ఎరుపెక్కిన తూరుపున
వచ్చిందిర తెలంగాణ!!

పల్లె పల్లెన
సయ్యంటూ
పిల్ల పాపలు
జై అంటూ
పాట పదునెక్కి
జనవేడుక కదను త్రొక్కగ
జగమెల్లా స్వాగతము పలుక
వచ్చిందిర తెలంగాణ!!

ఇవీ మన తలరాతలు

నేతల
కోతలు
మోతలు మోతలు
వెఱ్ఱి కూతలు!
రోత
మూతుల
ఆబోతుల
బూతులు
ఇవీ మన తలరాతలు!!

జోతల
చేతలు
జేబున
కాసుల పేరులు
వాహన వరుసలు
అడ్డదారిన ఆదాయాలు!!

వెతల
కతలు
రైతుల
కనుమూతలు
సామాన్యుని
ఆకలి చావులు
తరతరాలకు
తలవంపులు!!

గోతులు
త్రవ్వే
ఈ జిత్తులమారులు
చేతలు ఉడిగిన
అచేతనులు
అధికార మదాంధ
వ్యసనపరులు!!

ఉద్యమ నేతలు పదవికాశ పడితే...

ఉద్యమ నేతలు పదవికాశ పడితే
ఉద్యమమే ప్రక్క దారి పడితే
పిడికిలి బిగించి
ప్రాణాలకు తెగించి
వెంట నడచిన 
వేకువ వెదకిన
ప్రజలేమౌతారు?

వంచన పంచన
కూర్చొని
బేరసారాలు
కుదుర్చుకొని
బందువులను
రాబందులను
గద్దెనెక్కిస్తే
ప్రజలేమౌతారు

నా దారి వేరంటూ
ఉద్యమం ఒదిలేసి
వెంటనడచిన వారి 
నోళ్ళు మూయించి
పోరు బాటలు మరచి
మాటలకే పరిమితమైతే
కోటలకే దాసోహమంటే
స్వార్థం నరనరానా పాకుతుంటే
ప్రజలేమౌతారు?

నిప్పుల ఉప్పెనలౌతారు
నిశ్శబ్ద జల ప్రళయాలౌతారు
గర్జించే అగ్ని పర్వతాలౌతారు
పట్టిన చిలుమును
పెరిగిన కలిమిని
పట్టిన త్రుప్పును
పేరిన ధూళిని
ప్రజలు కడిగేస్తారు
కోటని
తోటని
పదవిని
బలిమిని
అర్థాన్ని
స్వార్థాన్ని
ప్రజలు కూల్చేస్తారు

ఆంధ్ర తెలంగాణ అభిప్రాయ భేదాలు

ప్రాంతాల విభేదం వచ్చిన తరువాత
నీది నాదన్న వాదనలోకి అడుగు పెట్టాక
ఎవరి అడుగులూ వెనుకకి పడవు
కావల్సింది ఇరువైపులా కాస్తంత ఓపిక

కటువు మాటలు కట్టిపెట్టండి
నిన్న మొన్నటిదాక మనం నేస్తాలం
కుటుంబ స్నేహితులం, ఇరుగు పొరుగులం
ఎవరూ వారికి చెందని ప్రాంతంలో ఉండాలనుకోరు
కావల్సింది ఇరువైపులా కాస్తంత ఓపిక

అంతలోనే శత్రువులంటూ దొంగలంటూ దూషించి
ఈసడింపు మాటలకు వెకిలి చేష్టలకు తావివ్వకండి
నిన్నటి స్నేహితుడు నేడు శత్రువంటే మానవత్వం విరగబడి నవ్వుతుంది
కావల్సింది ఇరువైపులా కాస్తంత ఓపిక

ఉద్యోగులైనా, న్యాయస్థానమైన ఎవరికి వారుగా
నేడైనా రేపైనా విడవలసినదే
తమ ప్రాంతానికి తరలవల్సినదే
అవమానించి అపహాస్యం చేయవల్సిన అవసరం లేదు
కావల్సింది ఇరువైపులా కాస్తంత ఓపిక

కొన్ని రోజుల ప్రశాంతత ఓపికా అన్నీ సరిపెడుతుంది
రాజకీయ బురద పోట్లాటలాపి కళ్ళు తెరవండి
అంతలోనే గగ్గోలుపెట్టి గర్వం ప్రదర్శించకండి
మీ ప్రాంతం మీద మీకెంత మక్కువో వారి ప్రాతం మీద వారికంతే
మక్కువ ఉంటుందని గుర్తెరగండి
కావల్సింది ఇరువైపులా కాస్తంత ఓపిక


రాకాసి రాజకీయం రంగు రంగు రూపాల్లో వస్తుంది
కొంపలు మునిగిపొయాయంటుంది,
అంతా వారి వల్లే జరిగిందంటుంది
తప్పులు కప్పిపుచ్చుకోటానికి ప్రతి అవకాశం వినియోగిస్తుంది
ఆ మత్తులో కొట్టుకుపోకండి
ఎవరి రాజకీయాలూ ఎక్కువరోజులు పనిచేయవు
నిజం నిక్కచ్చిగ నక్కల తోలు ఒలిచేస్తుంది
కాలం కసిగా వారిని పాదాల క్రింద నలిపేస్తుంది
ఇవి కదిలిపొయే మబ్బులు
కక్ష కార్పణ్యాలకు లొంగిపోకండి
జీవిత నేస్తాలను ఒదులుకోకండి
న్యాయం జరిగే తీరుతుంది
కావల్సింది ఇరువైపులా కాస్తంత ఓపిక

చెమట చుక్కల పురిటి నొప్పులు

పనిముట్టుల
కనికట్టులు
చెమట చుక్కల
పురిటి నొప్పులు
వెట్టి చాకిరి
తిరుగుబాట్లు
మురికి పట్టిన
పని బట్టలు
తట్టిలేపిన
ఆకలి కేకలు
చుట్టు ముట్టిన
అప్పుల బాధలు
ఉట్టిన మిగిలే ఆశలు
ఉత్తిగ రాలే జీవితాలు
మట్టిన కలిసే జాతకాలు
మేం చవి చూశాము

చెమట కరగందే
రోజు గడవదు
పోరాటమెరగందే
న్యాయం జరగదు
వందలు వేలు పనిచేస్తున్నా
ఒక్కడిక్రిందే బానిసలు
కదిలే ఇనుప చక్రాలు
కరగని రక్త పిపాసులు
బ్రతిమిలాడి
భంగపడి
పనికి తాళమేసి
మెరుపు సమ్మెలు
చేత ఎరుపు జెండాలు
ఇంట కడుపు కోతలు
భటుల కఱ్ఱ దెబ్బలు
దేహాన రక్తపు కాల్వలు
నిరాహార దీక్షలు
నిర్యాణ పర్యవసనాలు
మేము చవి చూశాము

జీవితాలను ఒడగట్టి
కొడగట్టి
కన్నీట ఒకరికి ఒకరై
తోడున్నాము
సంఘటిత శక్తులై మేల్కొన్నాము
ఒక్క పిడికిలితో
ఉక్కు పిడికిలితో
ప్రపంచానికి
క్రొత్త సూర్యుడిని రుచి చూపించాము
మేము కార్మికులం
గమ్యాలకు చేర్చే నావికులం
నిరాశ నిస్పృహలను
పధ ఘట్టనల క్రింద
త్రొక్కి తుత్తునియలు చేశాము
ఎర్ర సలాముల త్యాగ ధనులను
చూశాము
కార్మికలోకపు ఐకమత్యం
మేం చవి చూశాము
---------------------------------
కార్మిక దినోత్సవ శుభాకాంక్షలు

ఘంటసాల గానంబున కరిగిపోయి...

ఘంటసాల గానంబున కరిగిపోయి
తలపుల తేరుగట్టి మనో వీధిన ఏగుచుండ
మకరంద తేనియల వర్షంబు కురిసె
అద్భుతముల్కనుగొని అచ్చెరువొంది
ఇది ధ్యానమా పరధ్యానమా అను సంశయమునుండ,
ఊహల ఆకసాలను చుంబించు
పుష్పక విమాన యానమాయని
మనసు తృళ్ళిపడుచుండ
స్వార్థ ఫలము కోరి చేసిన తపస్సునకు ఫలితముండజాలదని
ఫలమాశించని మనోగమనము మహా తపస్సని
నేనెరింగితి
సర్వజ్ఞుడను కాదు
పండితుడను అసలే కాదు
అనుభవమ్ము గడించిన పామరుడిని
నిక్కచ్చి నిజములు మీకుంగోపము దెప్పించునో
తర్క వితర్కముల నన్ను భస్మీపటలము గావించదరో గానీ
మనసు బల్కిన పల్కులను
అక్షరముల మాలగా గూర్చితి
అంతర్జాలమున పంచ గోరితి

ఇది అసలు సిసలైన ప్రత్యేకహోదా!!

నాలుకా లేక తాటిమట్టా తెలియని స్థితిలో
నాయకులు నోటికొచ్చింది వాగేసి
ప్రజలకు హామీలు గుప్పించారు
ప్రత్యేకహోదా ప్రమాణాలు చేశారు

తీరా పదవులొచ్చాక
వెంకయ్య గారు ప్రత్యేకం తప్ప అంతా మాట్లాడతారు
మోడి మాటలు చేతలు మార్చేసి నవ వరుడైనట్లు తిరుగుతున్నారు
బాబు నోరు తెరుస్తే చాలు వరాల జడివాన కురిపించేస్తున్నారు
జగనన్న సభలలో మాత్రమే తన యుద్ధ ప్రతిభ కనపరుస్తున్నారు
మరి ప్రత్యేకహోదా గురించి వీరేం చేశారు?

వీళ్ళకి గొంతు పెగలడం లేదు
మాటలు రావడం లేదు
క్రొత్త రాజధానికి దిక్కు లేదు
పాత రాజధానికి వెళ్తే శత్రువులంటున్నారు
ఇది చాలా ప్రత్యేకహోదా!

దేశంలో ఆ ప్రభుత్వమే రాష్ట్రంలో ఆ ప్రభుత్వమే
కాని దమ్మిడి ఉపయోగం లేదు
కోట్లు మాటల్లో తప్ప చేతుల్లోకి రావడం లేదు
చేతల్లో ఒక్క హామీ జరిపి చూపడం లేదు
ఇది మరీ ప్రత్యేకహోదా!!

విభజనకు ముందు
ఐదేండ్లు ప్రత్యేకమంటిరి
తరువాత పదేండ్లు ప్రత్యేకమంటిరి
మంత్రులయ్యాక పదిహేనేండ్లు ఇచ్చినా తప్పు లేదంటిరి
ఇప్పుడు ఇవ్వలేమంటున్నారు
ఇది అసలు సిసలైన ప్రత్యేకహోదా!!

అమ్మ ఇప్పుడు ఒక చిన్న పాప

దేవుడి కథలు చెప్పి
భక్తి విలువ చెప్పి
అ,ఆలు దిద్దించి
అమ్మా..ఆవు నేర్పించి
చందమామను చూపించి
గోరు ముద్దలు తినిపించి
చందమామ చదివించి
చక్కని పదాలు నేర్పించి
చిన్న గాయమైతే విలవిల్లాడి పోయి
అల్లరి చేస్తే మహదానందపడి పోయి
నన్ను ముద్దు ముద్దుగా పెంచి
జీవితపు ప్రయాణంలో అలసిన అమ్మ
ఇపుడు ఒక చిన్న పాప!

మెల్ల మెల్లగా నడుస్తూ
తడబడే అడుగులు వేస్తూ
కళ్ళద్దాలనుండి తొంగిచూస్తూ
నచ్చకపోతే మూతి ముడుచుకుంటూ
అప్పుడప్పుడూ బోసినవ్వ్లు నవ్వేస్తూ
తెల్లటి వెంట్రుకలు ముడివేసి
ప్రశాంతమైన మోముతో
దేవుని పాటలు వింటూ
నిశ్శబ్దంగా శూన్యంలోకి చూస్తూ
ఎప్పుడంటే అప్పుడు నిదుర పోతూ
కనపడని మందుల డబ్బాకై మళ్ళీ మళ్ళీ వెదుకుతూ
పిల్లలతో పోటిపడి పోట్లాడుతున్న అమ్మ
ఇపుడు ఒక చిన్న పాప!

నోటిలో ముద్ద కడుపులోకి దిగాలంటే పన్ను కట్టాలా?

నోటిలో ముద్ద కడుపులోకి దిగాలంటే పన్ను కట్టాలా?
ఇంటిలోని వంటగదికి పోవాలంటే పన్ను కట్టాలా?
నిర్ణయించిన వారి పల్లు రాలగొట్టాలా?
కడుపు రగిలిపోతూంది వీరి పిచ్చి చేష్టలకి
గుండె మండిపొతూంది ఈ అసమర్థ విలువలకి

విభజించినప్పుడు అలోచించారా?
అయ్యా ఇష్టమొచ్చినట్లు విభజించారు
ఇబ్బందులున్నాయంటే ఆలకించారా?
కళ్ళు మూసుకుని పని చేస్తూ ప్రజల కడుపులు కొట్టారు
కన్నూ మిన్నూ గానక గురకలెట్టారు
రాజధాని పక్క రాష్ట్రంలో ఉంచేసి,
పోవాలంటే పన్ను కట్టాలి మరి!!
అది జగమెరిగిన సత్యం
పదేళ్ళ రాజధాని అవసరమా మరి?
ఇది విభజన గాయాల మహమ్మారి!
ఎవరు ఎవరా వెధవ నిర్ణయాల మార్గదర్శకులు
పని లేని శని గాళ్ళు పచ్చి మోసగాళ్ళు
విచక్షణలేని విషపు సర్పాలు
దూరదృష్టి లేని మంద బుద్ధులు
చదువుకోని వెర్రి నాగన్నలు సైతం విరగబడి నవ్వే
నిర్ణయాలు
దారీతెన్నూ లేని అడవిలో విడిచిపెట్టే గొప్ప సూత్రాలు

మూర్ఖుల ప్రకోపాలకు రాష్ట్రాలను బలియిస్తూ
చెదలు పట్టిన చదువులు చదివి చెత్త మనపై రుద్దేస్తూ
నోరు కుట్టేసి
చేసేదే చేస్తామంటూ
విభజించినదెవ్వరు?
 తలా తోకా లేని రాతలు రాసేదెవ్వరు?
వెనకుండి సమర్థించినదెవ్వరు?
ముందుండి దారిచూపినదెవ్వరు?
నిర్ణయాలు మురగబెట్టి పగబట్టిందెవ్వరు?
పదేళ్ళ రాజధాని అవసరమా మరి?
ఇంకా అచూరుకే పట్టుకు వ్రేళ్ళడటం అవసరమా మరి?

నిదుర పలుకరించింది

మూతలు పడుతున్న కనులు
నిద్దురను కొంచెం కొంచెంగా
అహ్వానిస్తున్నాయి
నిదుర భారం మొయలేక
కనురెప్పలు దాసోహమంటున్నాయి
క్రింద బూరుగ దూది పరుపా?
చలువ రాతి నేలా?
మట్టితో నిండిన రహదారా?
లెక్క చేయకుండానే శరీరం
జారిపోతూంది
కల మొదలయ్యీ విరామాలిస్తూ
కొంత విసుగు పుట్టిస్తోంది
కొంచెం మెలకువ! కొంచెం నిదురా!
కలగలసి వెలుగూ చీకటి కరిగించి
క్రొత్త దృశ్యాలు తెరకెక్కించినట్టుంది
చేయిని మెత్తని దిండుగా మార్చి
మెల్లగా మనసును అలోచనల
చెరసాలనుండి విముక్తి కల్పిస్తూ
హృదయం నుండి తీర్పు వెలువడింది
బాదలు, బాధ్యతలు, భారాలు
సంతోషాలు, సంబంధాలూ
ఇప్పుడెందుకో ఏవీ గుర్తుకు రావడం లేదు
తేలిపోతూ తూలిపోతూ
స్వేచ్చ దొరికిన పక్షిలాగా
ఎవరికీ అందని క్రొత్త లోకంలోనికి ఎగిరిపోతుంటే
సుఖానికి చిరునామా ఇప్పుడే దొరికినట్లుంది
దారం కట్టినంతసేపూ ఎలా తెంచుకోవాలన్న
గాలిపటంలాగా మనసు యుద్ధం చేసింది
దారం తెంచుకుని ఇప్పుడెగిరిపోతూ ఉంది

ఆశలు - దురాశలు

ఆశపడి
వెంటపడి
వేటాడి
సాధిస్తే
అది గెలుపు!
దురాశపడి
బలంతో
బలగంతో
గర్వంతో
స్వంతం చేసుకోవాలంటే
అది అహం నిండిన బలుపు

ఆశలు
కథలిస్తాయి
కదిలిస్తాయి
కవితలల్లిస్తాయి
విజయగాధల చరితనిస్తాయి
దురాశలు
మరపు రాని మరకలిస్తాయి
మృగపు ఛాయనిస్తాయి
పరాభావాన్నిస్తాయి
నియంతృత్వాన్నిస్తాయి

ఆశలు
కరిగిపోయే రుచులౌతాయి
కమ్మని అనుభూతులిస్తాయి
కలకాలం మిగిలే జ్ఞాపకాలిస్తాయి

దురాశలు
కరడుకట్టిన విషాన్నిస్తాయి
క్రౌర్యం నిండిన అనుభవాలిస్తాయి
కరిగిపోని వ్యర్థాలౌతాయి

కొనసాగు కనుచూపు మేరా కనులార్పని ఆ ఎదురుచూపు

ఆగని మనసు కాసే కాపు
కనులార్పని ఎదురుచూపు
ఆశ నిరాశల కూర్పు
కనులార్పని ఆ ఎదురుచూపు

నేర్వని భాషల నిట్టూర్పులు
నెరిపిన భాషణల ఓదార్పులు
నెమరేసిన జ్ఞాపకాల పలకరింపులు
నెమ్మది నెమ్మదిగా
కనులలో
తళుక్కుమనే నవ్వులు
చురుక్కుమన్న కోపాలు
తడితగిలి మసకబారి
ఒక్కొక్క చుక్కా జారి
ఎందుకోయని
యేలనని
కొనసాగు కనుచూపు మేరా
కనులార్పని ఆ ఎదురుచూపు

చెమర్చిన కళ్ళు నల్లని కాటుక చివరలను
మరింత అందంగా దిద్ది,
సరిచేసిన విల్లులై కనుబొమ్మలు ఒయ్యారాలు ఒలుకుతూ
ముడిపడుతూ విడిపోతూ
కొంటె చూపులు కొంత జోడించి,
ముంజేతిని ఆనుకున్న
మోము అంచున మంద్రముగ
పాడుతున్న గొంతులోని రాగం
పెదవి దాటి పొరలకుంది
మనసులోని ఆత్రుత
తీరాన్ని దాటకుంది
కొనసాగు కనుచూపు మేరా

కనులార్పని ఆ ఎదురుచూపు

చక్రవాకాలకు సిద్ధమౌతూ
ఉప్పెనలకు సమాయత్తమౌతూ
సంభ్రమాశ్చర్యాలకు పురివిప్పి
మోమున ఒక ఒంక నెలవంక
మరో వంక మినుకు మినుకు మంటున్న ఆశల వేడుక
కొనసాగు కనుచూపు మేరా

కనులార్పని ఆ ఎదురుచూపు

పొరలు పొరలుగా ఆ గ్యాపకాలు నా చుట్టూ తెరలు కట్టుతుంటాయి

బడి ముందల కూకున్న
అచ్చమ్మవ్వ కలే పండ్లమ్ముతుంది
బిక్కిపండ్లు, జామపండ్లు, రేగుపండ్లు,
ఉసిరికలు, గంగి రేగుపండ్లు
కుప్పలు కుప్పలు పోసి అమ్ముతుంది

ఒంటికి గంట గొట్టేస్తానే చెడ్డీలు లాక్కుంటూ
ఉరుకుల పరుగులతో మేమంతా
ఆ బండ చుట్టూ చేరుతాము
అదివ్వు ఇదివ్వమని రచ్చ రచ్చ చేస్తాము

రెండు పైసలు, ఐదు పైసలు,
పావులాలు ఘల్లు ఘల్లుమని రాలతాయి
పట్టమీది పండ్ల కుప్పలన్నీ కరిగిపోయి
పట్టకింద కాసులగుట్టలై పెరుగుతాయి

తాత అప్పుడప్పుడూ వస్తాడు
ఎర్ర కళ్ళతో తాగి తూలుతూ వస్తాడు
వాన పడితే తాత గొడుగు పడతాడు
అప్పులు పెడితే పర్వాలేదంటాడు
అప్పుడవ్వా తాతలకు జగడం మొదలౌతుంది

ఒకటో అయ్యవారు రెండో అయ్యవారు
చీమిడి ముక్కుల సీనుగాడు, దారినపోయే
దానయ్యలు అందరూ పోటీబడిగొంటారు
రేగ్గాయలపై జల్లె ఉప్పుకారం కోసం
ఎగబడతారు
సాయంత్రం ఉడికించిన గుగ్గుళ్ళకై
గొడవలుబడతారు

అనపలు, శనగలు, అలసందలు, వేరు శనగలు
పెసరలు, తిరగమాత పెట్టి మహ రుచిగా
భలే రుచిగా అవ్వ వేడి వేడిగా తీసుకొస్తాది
ఒక్కోసారి ఒక్కోరకం గుగ్గిళ్ళు
ఇన్ని రుచులు సాద్దెమా అని మాకాశ్చర్యం
అత్తిరాసలు, వడలు, కజ్జికాయలు అప్పుడప్పుడూ
పండగలెనకాల అమ్ముకొస్తాది
శనగుంటలు, నువ్వులుంటలు, బఠాణీలు
కలకండ రాళ్ళు పల్లు పట పటలాడించే చిరు తిళ్ళు
 అవ్వ మోసుకొస్తాది

బండ మీది అమ్మకాలు బండిమీదికి మారినాయి
బండిమీది అమ్మకాలు అంగడిగా మారినాయి
తాత కనిపించక మనవడు అమ్మబట్టె
అవ్వ అప్పుడప్పుడూ కనిపించి మాయమాయె
పై బడికి పోయినా చిన్నప్పటి  గ్యాపకాలు మరచిపోక
అప్పుడప్పుడూ ఆ అంగడికి పోయెటోణ్ణి
పొరలు పొరలుగా ఆ గ్యాపకాలు నా చుట్టూ తెరలు కట్టుతుంటాయి
తెరలపైన పసితనపు చిత్రాలు కదులుతుంటాయి

అన్నపూర్ణ ఒకనాడు

అన్నపూర్ణ ఒకనాడు
కాలేకడుపు ఈనాడు
పంట చేతికొచ్చినపుడు
బండ్ల నిండా ఒడ్లమూటలతో
ముసిముసిగా నావ్వుతూ
మీసాలు మెలివేసెను నాడు
పట్టణంలో పొట్ట చేతబట్టి
పొగ బండ్ల మధ్య ఉక్కిరిబిక్కిరౌతూ
గోడుగోడుమని ఏడుస్తున్నాడు నేడు
పదిమందికి పని ఇచ్చి
రాజులా బ్రతికెను నాడు
కూలీగా, కరవు ఆనవాలుగా
బరువుగా బ్రతుకీడుస్తున్నాడు నేడు
చెరువులకై దానమిచ్చి
గుడులకు, బడులకు దానమిచ్చి
గుప్పెడు ఆత్మ విశ్వాసంతో బ్రతికెను నాడు
గొట్టం బావులు పనికిరాక
గుక్కెడు నీరు కొనలేక
గరళం మ్రింగుతున్నాడు నేడు
పండుగంటే పల్లేల్లో మొదలవ్వాలనే వారు నాడు
పల్లేలే కనుమరుగయ్యి స్మశానాలౌతున్నాయి నేడు
ఇది వినాశనం
రైతు బ్రతకలేని రాజ్యం రాక్షసుల నిలయం
ఇది స్వనాశనం

నవ్యాంధ్ర, దివ్య తెలంగాణలను దీవింప

తెలుగు అక్షరములే బంధములై జాతి మూలములైన
నవ్యాంధ్ర, దివ్య తెలంగాణలను దీవింప
ధైర్య వీర్యములు, విజయ వైభవములు కలుగునని ఆశీర్వదింప
వేంచేయుచున్నది మన్మథ నామ యుగాది!!

వసంతపు పరవళ్ళతో
మామిడి పిందెలు పొంగి పోతూ
వేప పూతలు చిరునవ్వులు చిందిస్తుంటే
లేత చివురుల పచ్చని పలుకరింపులు వెంటరాగా
రంగవల్లుల అల్లికల పల్లకిలో
వేంచేయుచున్నది మన్మథ నామ యుగాది!!

నూతనాన్ని ఆవిష్కరిస్తూ
చేదు మరచిపోకంటూ
పులుపు మన వెంటే ఉంటుందంటూ
తీపి తప్పక ఎదురౌతుందంటూ
వేంచేయుచున్నది మన్మథ నామ యుగాది!!

తెలుగు అక్షరమాలికలు కవితలై, కావ్యాలైతే
తెలుగు భాష తీయదనం తరతరాలకు అందిస్తూ
తెలుగు వారి స్నేహం ఎల్లలు ఎరుగని బంధమని  చాటుతూ
వేంచేయుచున్నది మన్మథ నామ యుగాది!!

మాతృ భాష తెలుగు
మధువై కలమున ఒలికేది తెలుగు
మధురమై జిహ్వ పై నాట్యంబాడునది తెలుగు
అక్షర వనములై నా చుట్టూ అల్లుకున్నది తెలుగు
ఆ తెలుగునకు వెలుగునిస్తూ, ప్రకృతి పరవశించు ఉషోదయమిస్తూ
వేంచేయుచున్నది మన్మథ నామ యుగాది!!

హిమశోభల కాశ్మీరం రుధిర ధారలొలికిస్తోంది!!

తుపాకుల మోతలతో
రక్తమోడుతున్న శరీరాలతో
కుత్తుకలు కత్తిరిస్తున్న తీవ్రవాదంతో
భరతమాత తలకిరీటం తడిసిముద్దవౌతోంది
హిమశోభల కాశ్మీరం రుధిర ధారలొలికిస్తోంది

గులాబీలతో ప్రసిద్ధిగాంచిన కాశ్మీరం
ముళ్ళతో, పదునెక్కిన తుపాకీ గుళ్ళతో నిండిపోయింది
పగలూ రాత్రీ తేడాలేకుండా నిలువు నరకం అనుభవిస్తోంది
తెగులపట్టిన చెట్టల్లే కృశిస్తోంది
హిమశోభల కాశ్మీరం రుధిర ధారలొలికిస్తోంది

వేర్పాటువాదుల చేతుల్లో తలరాత తిరగబడి
రాజకీయపు విషపుకాటుకు నేలవ్రాలుతూ
మానవత కరువైన మతారణ్యమై ఉడుకుతూ
సైన్యపు పదఘట్టనల క్రింద నలుగుతూ
హిమశోభల కాశ్మీరం రుధిర ధారలొలికిస్తోంది

ఈ దేశపు మట్టిలో పుట్టి, ఈ నేలపై రాలిపోతూ
ఈ గాలి పీలుస్తూ భారత దేశపు వనరులు మ్రింగేస్తూ
కృతజ్ఞతలేని ఈ మనుషులు
ప్రేమ పాలు పోసి పెంచిన విషనాగులు,  మత మౌఢ్యులు
చట్టాల్ని చుట్టలుగా చుట్టి తలక్రిందపెట్టుకొని
ప్రక్క దేశపు కొమ్ము కాస్తూ ఆరని నిప్పును రగిలిస్తుంటే
హిమశోభల కాశ్మీరం రుధిర ధారలొలికిస్తోంది!!

గోడు వినే నాథుడు లేక తెలుగు రాష్ట్రాలు వీధిన పడ్డాయి

మాటల మాంత్రికులు వెంకయ్య
చేతల శూన్య వీరులు మీరయ్య!
ఊరూర తిరిగి చేసిన వాగ్ధానాలు ఏమయ్యాయి?
ప్రజల మదిలో అలోచనలు రగిలించిన కూర్పులు
ప్రదానిని ఒప్పించడంలో ఎందుకు విఫలమయ్యాయి?
విభజనలో తెలివిగా పాలు పంచుకున్న మీవారి అతి తెలివితేటలు,
కోటలు దాటిన మాటలు, కట్టు కథలేనా??

విడగొట్టి, తెలుగు రాష్ట్రాల బలం పడగొట్టి
హస్తిన చుట్టూ తిరిగేలా
కేంద్రం ముందు మోకరిల్లేలా
ఎంత దుస్థితి కల్పించారు!!?
కల్పిత గాధలతో ప్రజలను మభ్యపెట్టారు
ఒకప్పుడు 42 సభ్యులతో ఉన్నతమైన స్థితి నుండి
ఇప్పుడు గోడు వినే నాథుడు లేక తెలుగు రాష్ట్రాలు వీధిన పడ్డాయి

చేతకాకపోతే త్రప్పుకోండి
ప్రజలను క్షమాపణలడగండి
మీ పై పై మాటల పూతలతో తెలుగు వారిని మభ్యపెట్టలేరు
రాజధాని లేని ఆంధ్ర, అభివృద్ధి లేని తెలంగాణ
మీ కుఠిల నీతికి నిలువెత్తు సాక్ష్యాలు

ఇప్పుడు కాలం మారింది, మీరింకా 5 ఏండ్ల భ్రమలో ఉన్నారేమో
జనాలు బట్టలిప్పికొడతారు జాగ్రత్త
మొండి చేతల మోడులను తరిమేస్తారు
బట్టల మీద పేర్లు వ్రాసుకునే పిచ్చి సన్నాసులని తరిమి కొడతారు
ప్రజలు అభివృద్దిని క్షణ క్షణం లెక్కిస్తున్నారు
ప్రసారాల మాధ్యమాలవారు మీ ప్రగల్భాల చరిత్రను కొలుస్తున్నారు
మీ ప్రణామాల ప్రమాణాలు నిప్పుతో కడుగుతున్నారు
అభివృద్ది పేరిట పరిశ్రమలకు దాసోహమంటే
ప్రజలు అభినందిస్తారనుకున్నావా?
పరిశ్రమలే ముఖ్యమనే మూర్ఖ భావనలతో
ప్రజలు హర్షించని సంస్కరణలు మీకు యమ పాశాలౌతాయి!!

ముల్లు పంటితో తీస్తామంటున్నారు.....

రాష్ట్రం పగ్గాలు చేతికందగానే
ఎందుకు స్థిరపడతారు ఫోండి ఫోండి అన్నారు
స్థానిక ఎన్నికలు దరికొచ్చేసరికి
ముల్లు పంటితో తీస్తామంటున్నారు
సూటి పోటి మాటలతో గుండె గాయమే చేసి
వింత నిర్ణయాలతో విరక్తి పుట్టించి
ఎన్ని వేషాలేస్తారు?

మీకు బాకా ఊదిన పత్రికలు, కవి పుంగవులు
తరిమేద్దామని కలలుగన్న అంతర్జాల రచయితలు
నోరువెళ్ళబెట్టి చూస్తున్నారు
ఏ నిర్ణయానికి ఒత్తాసు పలకాలో తెలియక
బుర్రలు బ్రద్దలు కొట్టుకుంటున్నారు
ఒక పంధా అనుసరిస్తే మీ వెనుకనున్నవారు
నవ్వులపాలు కాబోరు
వారేమో నిజం మరచి ఉద్వేగంతో ఉత్సాహంతో
పుంఖనుపుంఖాలుగా మీ నిర్ణయాలు కీర్తిస్తే
మీరు తూచ్చి చెప్పి క్రొత్తగా దిమ్మతిరిగే నిర్ణయాలు వెలువరిస్తే
ఏ గంప క్రింద దాక్కోవాలో తెలియక మూగవోతున్నారు బాకావీరులు
స్థిరపడినవారి భుజం తడుతున్న మీ వైఖరికి
కవితలు రాక కారం పూసుకుంటున్నారు
ఎందుకీ విద్వేషాలు?

మనం తెలుగు వారలం
తరతరాల బాంధవ్యపు వెలుగు నీడలం
పట్టుదలలు, పంతాలు వదిలేసి
చేయి చేయి కలిపి నడుద్దాం
భావి తరాలకు తెలుగు వారధులు నిర్మిద్దాం
భాష నిరంతరం
మనం  గతించినా నా నాలుక నీ నాలుక పలికిన,
పలికించిన భాష తరతరాలకు సాగుతుంది
మృతించు ప్రతీకారాలకన్నా ప్రేమ పంచే అమృత భాషకై పాటుపడదాం
క్షరం లేని అక్షర యజ్ఞానికి అంకితమౌదాం

వడి వడిగా వచ్చిన మన వేడి వేడి మోడి

ఆకాశం దాటే మాటలు
కోట్లల్లో పెట్టుబడులు
అగ్ర రాజ్యాలతో మంతనాలు
ఊపిరి బిగబట్టే హడావుడి
వడి వడిగా వచ్చిన మన వేడి వేడి మోడి

దేశంలో మహిళలు అరాచకాలకు బలియైతున్నా
బడుగు జీవులు బ్రతకడానికి దారి చూపమంటున్నా
మతాల పేరుతో బాబాలు స్వాములు పిచ్చి కూతలు కూస్తున్నా
ఉలకడు పలకడు కనీసం ఖండించడు
వడి వడిగా వచ్చిన మన వేడి వేడి మోడి

రంగు హంగుల తలపాగలు
దొరలకు సాటిగా సరితూగగ పేరు మలచిన అంగీలు
విదేశాలలో వీరోచిత ఉపదేశాలు
విలక్షణ శైలికై తడబాట్లే తప్ప
ఉభయ సభలలో కాలు మోపడు
వడి వడిగా వచ్చిన మన వేడి వేడి మోడి

మన్మోహనుడు ప్రజలకు కనిపించినా మౌనంతొ విసిగిస్తే
మోడి ప్రజలకెదురుపడకుండానే పరుగులుతీస్తున్నాడు
మంచి రోజులొచ్చాయంటూ ఆయన మంచిగానే ఉన్నాడు
ఎన్నికల సభలలో మాత్రమే మాయాజాలం కురిపిస్తున్నాడు
వడి వడిగా వచ్చిన మన వేడి వేడి మోడి

ఆకాశవాణిలో ప్రజానాడి గమనిస్తాడు
ఆకాశంలోనే పయనిస్తాడు
స్వచ్చ భారతంటూ మొదలు పెట్టి మటు మాయం అయ్యాడు
నూరు రోజుల్లో నల్ల ధనం తెస్తానంటూ
రెండు నూర్ల రోజులైనా కిమ్మనకున్నాడు
హస్తినలో చీపురు ముస్తాబు చూసి
మతి తప్పినట్లున్నాడు
వడి వడిగా వచ్చిన మన వేడి వేడి మోడి!!

గోచీ కూడ మిగులకుండా మంచి కసరత్తే చేస్తున్నారు..ఓ బాబు!!

అప్పుల కుప్పల మధ్య తన్నుకునే అన్నదాతకు
రుణ విముక్తి కలిగిస్తానన్నారోబాబు
కానీ జీవన్ముక్తి మాత్రమే కలిగిస్తున్నారు
ఆధారాలు అన్నీ కలిపి చూపినా మెదలకున్నారు
జీవనాధారాలు రాలిపొతుంటే నిమిత్త మాత్రులై చూస్తున్నారు
బక్కరైతులు మాత్రం బలియైతూనేవున్నారు..ఓ బాబు

అప్పుల నుండి కాపాడబోయి కుత్తుక మీదికి తెస్తున్నారు
కరువు రోజులు మెండుగా కలిపి తెస్తున్నారు
కేంద్రం గుమ్మం ముందు బిక్కు బిక్కుమంటూ నిలుచున్నారు
బికారియై వెల వెల పోతున్నారు..ఓ బాబు

ఉన్న పళ్ళు ఊడగట్టి మిద్దెలు మేడలు కడతానంటారు
గోచీ కూడ మిగులకుండా మంచి కసరత్తే చేస్తున్నారు
మంత్రాంగం, మేధావితనంతో కాలం కరిగిపోతుంది కానీ
గనులు త్రవ్వినా, ఇసుక తెగనమ్మినా,
ఎర్ర చందనం అడవులంతా వేలం వేసినా
కరువు తీరదు, కాలే కడుపుకు కాస్త గంజి దొరకదు..ఓ బాబు

మెల్లగ కదిలే తాబేలు గెలిచినట్లు
పరుగెట్టిన కుందేలు అలసి ఓడినట్లు మనకు ముందే తెలుసు
ఒక్కొక్క అడుగు చూసివేయండి, క్రింద నమ్మిన ప్రజలున్నారు
ఆశగా క్రొత్త భవిష్యత్తుకై ఎదురుచూస్తున్నారు
మోడీలను నమ్మి మీరు మోడవ్వకండి
ముందు మాట త్రప్పిన వైనం మఱి చేయకండి..ఓ బాబు

వాస్తు భయం తమరి పదవికా లేక మన ఊరికా?

మనుషుల్ని విడదీయాలన్నది మీ  అభిమతమైతే
ఐక్యత మీ పదవికి, ఉనికికి ఎసరనుకుంటే
కలిసే ప్రతి కూడలిలో నిప్పులు పోస్తారు
విమర్శిస్తే మాధ్యమాలు మూయిస్తారు
ప్రజాస్వామ్యపు గొంతు నొక్కేస్తారు

విడిపోయినా కలిసుండడానికి ఉన్న అవసరాల
కనీస ప్రయత్నాల్ని గండి కొడతారు
రెండు మార్లు ఒకే పరీక్ష విద్యార్థులు వ్రాయాలంటారా?
పాలించమంటే ఈ పనికిమాలిన చేష్టలు తగునంటారా?

స్వంత భయాలకి, స్వార్థ చింతనలకు
ప్రజల డబ్బును బలిపెట్టాలా?
వాస్తు భయం తమరి పదవికా లేక మన ఊరికా?
ఊరికైతే చాలా ఇళ్ళు పడగొట్టి మళ్ళీ కట్టించాలి సుమా!!

రైలు మార్గం స్వంత దార్లో నడవాలని పట్టు
నీటికై ప్రక్క రాష్ట్రంతో శిగపట్లు
భజన పరులూ, బాకా పత్రికలే మన చుట్టూ
ప్రజలకై మనం ఏం ఆలోచిస్తున్నట్లు?

మీరు రాజకీయం మింగిన ఉద్యమకారులు
నిషా తలకెక్కిన వారి రంగుల మేడలు మీ అడియాశలు

కళ్ళు తెరచి చూసే లోపల ఊడిపోతాయి ఈ పదవులు

సామాన్యులే వంచగలరు మీ మెడలు!!

పదవి ఊడిన ప్రక్క రాష్ట్రపు ముఖ్యమంత్రిని చూశారా?
బంగారు సింహాసనమునెక్కి నీలిగిన వ్యక్తి కతలు చదివారా?
ప్రజలు నచ్చని ముఖ్యమంత్రికి దశాబ్దపు వనవాసం ఎరుగుదురా?
విభజన విషం చిమ్మిన నూరు ఎండ్ల చేతి గుర్తు చెదిరిపోయింది తెలియదా?
క్షణ భంగురపు చౌక బారు ఎత్తుగడలు కట్టి పెట్టి ప్రజలకై బ్రతుకు మిత్రమా!!

పేద రైతు ఆత్మహత్యలకు కారణమెవరు, కరుణించేదెవరు?

పదవిలోకొచ్చేసి
ఇచ్చిన మాటలన్నీ మరిచేసి
మడత నలగని బట్టలేసి
మట్టి పాదాలకంటని ఈ నాయకులు
మట్టి విలువ తెలియని ఒట్టి అమాయకులు
భూములను మ్రింగే మాయావులు

ఎన్నికల ముందు పాదయాత్రలు
ఎన్నికల తరువాత విమాన యాత్రలు
ప్రచారాలకూ ప్రారంభాలకూ విలువనిస్తూ
ప్రజల ప్రారబ్ధం గమనించని ఈ నాయకులెందుకు?

ప్రజలకు చేరని పధకాలెందుకు?
పేదల ప్రతినిధికాని ప్రభుత్వమెందుకు?
మూర్ఖుల చేతిలో మన భవిష్యత్తు పగ్గాలెందుకు?

చిత్రాలకు పరిమితమై విమానాలకు, విఫణులకు మాత్రమే విలువిస్తే
రైతాంగం దారేది, సాగు భూములకు నీరేది?
పేద రైతు ఆత్మహత్యలకు కారణమెవరు, కరుణించేదెవరు?
పది కూడ ఫలితమివ్వని వేయి పధకాలెందుకు?

భజనపరులు చుట్టూ ఉంటే
విమర్శలెలా తెలుస్తాయి?
వీధులవెంట జెండాల రంగులే తప్ప
ప్రజల కడగండ్లు ఎలా కనిపిస్తాయి?
ప్రచారాల డప్పు హోరులో ప్రజలకష్టాలు మూగవోతాయి

ప్రజాసమస్యను తెలుసుకున్నవాడే నిజమైన పాలకుడౌతాడు!
సమస్యను ఎదుర్కొన్నవాడే సరైన నాయకుడౌతాడు!!
సమస్యను పరిష్కరించినవాడే మాహాత్ముడు, కారణ జన్ముడౌతాడు!!!

నిజంగానే మీరు నిజాం పాలనను మొదలెట్టినట్లే ఉంది!!

నిజాము రాజ్యపు
అరాచకాలు
రజాకార్ల అత్యాచారాలు
భారతావనికి మానని గాయాలు
చరిత్ర పుటలనుండి
చించేద్దామని
చెరిపేద్దామని
లేని పొగడ్తలు అతికేస్తూ
గొప్పతనమంటూ అబద్దాలు పులిమేస్తూ
ప్రజలపై పట్టు కోసమని
పెడ దారులు పడుతూ
నీతిమాలిన రాజకీయనాయకులు
స్వలాభం కోసం
తాము ప్రత్యేకమని చూపడానికి
స్థానికత విషం వ్యాపింపచేయడానికి
విభిన్నత చాటుకోడానికి
మిడిసిపాటు నిలుపుకోడానికి
మనము మనుషులన్న మాట మరచిన
నిజాము పాలకుల
నిర్దాక్షిణ్యపు పాలనల
వారసులమని
మురిసిపోతున్నారు
మాన ప్రాణాలను
ఆడుకున్న తోడుకున్న రాక్షస నైజపు
నిజాము రజాకార్లు
మీకు మార్గ దర్శకులా?
కర్కశ కౄర పాలకులపై పొగడ్తలా?
ఇది చరిత్ర క్షమించని నేరం
ఎరుపెక్కని ఈ మౌనం చూస్తుంటే
మీ దొరతనం మా గొప్పగా సాగుతోంది
నిజంగానే మీరు నిజాం పాలనను మొదలెట్టినట్లే ఉంది