ఇకనైనా ఏలుకోండి ప్రక్క రాష్ట్రం మీద పడి ఏడవకుండా

ఇకనైనా ఏలుకోండి ప్రక్క రాష్ట్రం మీద పడి ఏడవకుండా
కుంటి సాకులు కుండ నిండా కాచి జనాలకు చల్ల పోసి
వెనుకబాటుతనమంతా ప్రక్కవారి చలవేనని
దౌర్జన్యం దోపిడీ ఇతరులకు అంటగట్టి
తామేమీ తెలియని అమాయకులమంటే
ప్రజలు వెర్రెత్తిపోయి కిర్రెక్కిపోయి అందలమెక్కించారు
మీ వి"భజన"కి వంత పాడారు
నిజం త్రవ్వి తీస్తే నుసిగా మారిపోదా మీ ఎత్తుగడ
కాలానికి నిలిచిననాడు తేలిపోదా మీ పగటి నీడ
ఇన్నాళ్ళూ ప్రాంతీయ వైరం మీద నెట్టి ఎదగలేకపోయామన్నారు
పదవిస్తేనే విభజిస్తేనే ప్రగతి సాధిస్తామన్నారు
ఇప్పుడు మీదేగా పాలన, చూద్దాం ఎంత వెనుకబాటు తీరుస్తారో
ఎంత ముందుకు తీసికెళ్తారో
ఇప్పుడపవాదులెవెరిమీదేస్తారో 
అపుడూ ఇపుడూ మీరే ప్రజాప్రతినిధులు
మరి గతంలో ఏం చేశారు, ఎంత ప్రగతి సాధించారు
విలాస భవంతులనుండి హాస్యం తిలకించారు
రాష్ట్రం రగులుతుంటే చోద్యం చూసారు
ఎన్ని యువప్రాణాలు బలి అయ్యాయి
ఎన్ని కుటుంబాలు తీరని వ్యథకి లోనయ్యాయి
పదవిస్తేనే పోరాడతారా ప్రజలకొరకై?
అరవై ఏండ్లలో సమాజ నిర్మాణానికి ఏం ప్రయత్నించారు?
హస్తినలో నిరంతర రాయభారాలు ప్రజలకోసమా, పదవికోసమా?
బావోద్వేగాలతో ఆడుకున్నవారు ధరావత్తు కోల్పోయారు
రాజకీయ చరిత్రలో కనుమరుగయ్యారు
కాలం పరీక్షలో ఇపుడు మీ వంతు
చెదిరిపోయే చెడు అనుభవమై మిగులుతారో
చెరిగిపోని చరిత్ర పుటలపై నిలుస్తారో
కాలమే నిర్ణయిస్తుంది

చెలిమి లిఖించిన జ్ఞాపకాల పుటల్లో

చెలిమి లిఖించిన జ్ఞాపకాల పుటల్లో
ఏదో మరచిపొయాను...ఏంటబ్బా!?
ఈదుతున్నప్పుడు జారిపోయిన కిట్టిగాడి చెడ్డీ చమత్కారం గురించా?
వనజకు వీడుకోలు తెలుపుతూ క్రిందపడి శాశ్వత గుర్తును
ముక్కుపై వేసుకున్న బాలు విరహం గురించా?
తప్పిపోయిన కుక్కపిల్లకై అన్నం మానేసిన బాచి అభిమానం గురించా?
మంచం క్రింద దాక్కుని నిదురపోయి ఊరినంతా వెదికించిన
వేణు నిర్వాకం గురించా?
చలిమంటకై గడ్డివామిని తగులబెట్టి వీధికెదురు నిలిచినా నా తెగింపు గురించా?
తేనెపట్టుకు పొగబెట్టబోయి దుప్పటి ముసుగులో ఇంటిని అంటించిన జగను సాహసం గురించా?
కుక్కల్ని భయపెట్టబోయి ఒళ్ళంతా కరిపించుకున్న వాసు ధీరత్వం గురించా?
బాదంకాయకై రాయి విసిరి నిలువెత్తు గాజు అద్దం పగులగొట్టి
ఆరు నెలలు వీధిని వెలివేసిన ప్రసాదు ఉద్యమం గురించా?
రాత్రంతా చదివి పరీక్షలో నిద్దురపోయిన మధు అలుపెరగని పోరాటం గురించా?
పులికైనా ఎదురునిలుస్తానని చెప్పి బల్లి మీదపడి భయపడి 
జ్వరమొచ్చిన నవీను శూరత్వం గురించా?
అబ్బో చాలా గుర్తొచ్చేశాయి!!
కాని మరేదో జ్ఞాపకం మరచిపోయాను

గుండెలో నీ గుడి

ఈ మధ్యే గుండె లయతప్పిందట
అన్ని పరీక్షలు చేసి
కొన్ని మందులు వ్రాసి
చెప్పారు వైద్యులు జాగ్రత్త అని
గుండె నిండా నీ చిత్రాలు రక్తానికి అడ్డం పడుతున్నాయట
ఇది నా వ్యాధి ముదిరిందని చెప్పటానికి అద్దం పడుతుందట
గుండె చప్పుడు మారి కూని రాగాలు తీస్తుందట
ఇది జబ్బుల జాబితాలో క్రొత్త విషయమని శలవిచ్చారు
నీ కౌగిలింతలతో గుండె వేగం పెరిగే అదృష్టముందన్నారు స్నేహితులు
శస్త్ర చికిత్స చేస్తామంటే
ఎక్కడ నీ జ్ఞాపకాలు గుండెల్లోనుండి ఎగిరిపోతాయోనని వద్దన్నా
గుండె మార్పిడి నేను కుదరదన్నా..చూశావా త్యాగాలమయమయ్యింది జీవితం
గుండెలో నీ గుడి కట్టమని నిన్ననే మేస్త్రిని కలిశా
ఎండాకాలం ఇసుక వెల ఎక్కువని కాస్త ఆగమన్నాడు
నీకై నేను చేయని ప్రయత్నంలేదు
నీవు త్వరగా నన్ను చేరకపోతే
నే చేజారిపోయే ప్రమాదముంది

రెండు రాజధానులొదిలాం, మన కష్టం ఒట్టిపోదు

కొంతమంది వెర్రి వెధవలు
ఫో అంటే
అధికార మదమెక్కిన
ఆంబోతులు సవాలు చేసి శివాలెత్తుతుంటే
మరి ఇంతమంది, కోట్లమంది ఏం పట్టనట్టు 
మనం వారికేం చెందనట్టు
మనల్ని ఎపుడూ ఎరగనట్టు
ఏదొ ఇంతకాలం బిచ్చమేసినట్టు
పీడ విరగడైనట్టు
ప్రవర్తిస్తున్న వీరితోనా మనం కలిసినడిచాం
వీరితోనా ఇన్ని తరాలు సోదరభావంతో మెలిగాం
స్వాభిమానం హద్దు మీరితే స్వార్థమే
ఆత్మాభిమానం తలవంచితే అవమానమే
కుళ్ళిన శవాల మధ్య నిదురిస్తే నీవూ శవమే
వారు క్రొత్త తల్లిని కనుగొన్నారు
విలక్షణంగా ఎదగాలనుకున్నారు
త్వరలో క్రొత భాషనూ కనిపెడతారు
మనమెవరో ఉనికే తెలియదంటారు
ఇంకా ఎందుకన్నా అలోచిస్తావు
ఏం మిగిలుందని వెనుతిరిగి చూస్తావ్?
స్నేహితులే శత్రువులై తరుముతుంటే
ఇంటికప్పే నీపై ఉరుముతుంటే
రెండు రాజధానులొదిలాం, మన కష్టం ఒట్టిపోదు
సున్నా నుండి మొదలు పెట్టడం మనకేం క్రొత్త కాదు
తెలుగు మహామహుల విగ్రహాల తలలే నరికారు
ఏదో పొట్ట చేతబట్టొచ్చిన గొట్టం సుబ్బడు నీవెంత
వారి సంస్కారం ముందు మనమెంత
మన నెత్తురు, మన చెమట ధారపోసిన నేల వదిలి
మనం ముందుకు సాగాలి
సొంత ఊరు పిలుస్తోంది రా కదిలి రా
నవ్యాంధ్ర ఉదయిస్తోంది రా రా

కన్నీటిచుక్క

తోకచుక్కై జారి నేల తాకకుండానే ఎటో మాయమయ్యింది కన్నీటిచుక్క
క్షణంలో మాయమయ్యింది కన్నీటిచుక్క
నిర్ణయమేదో రూపుదాల్చకుండానే మదిలో మిగిలిపోయినట్లు
తీరం తాకిన కెరటమేదో సముద్రంలోకి తిరిగి ఒరిగినట్లు వెనక్కుతగ్గిందో కన్నీటిచుక్క

కనుకొలుకుల కట్టలు దాటి పొంగిపొర్లుతూ
చారికలు చేస్తూ జారిపోయిందో కన్నీటిచుక్క
దారి ఎరిగిన కాలువల్లే బుగ్గలనుండి జారుకుంటూ తన దారి చూసుకుంది
ఉద్వేగం ఉక్రోషం అచేతనం ఆక్రోశం ఆనందం అద్భుతం
తేడాల్లేకుండా పుట్టుకొస్తుంది కన్నీటిచుక్క

మన అనుబంధం చిరకాలమంటోంది కన్నీటిచుక్క
తన వెచ్చటి స్పర్శలో చనువెక్కువ కనబడలేదా అంటూంది కన్నీటిచుక్క
వెళ్ళిపోతూ భారమంతా తీరుస్తుంది
ఒడలిపోయిన మోము కడిగేస్తుంది
తీరు మార్చే యోచన చేయిస్తుంది కన్నీటిచుక్క

పొరలి పొరలి పొంగుకొస్తుంది
ఆగనంటూ తరలిపోతుంది
కొన్నిసార్లు కన్నుల్లో గింగిరాలు తిరుగుతుంది
మరికొన్నిసార్లు కప్పేసిన కనురెప్పల మాటున దాగిపోతుంది
ఏ అర్ధరాత్రో దిండు తడిసిపోయేలా సుడులు తిరుగుతుంది  కన్నీటిచుక్క

మబ్బులు వీడిన ఆకాశంలా 
కళ్ళలో ఏవో క్రొత్త వెలుగులకు తిరిగి జీవం పోస్తూ
నిమిత్తమాత్రులమని నిలచిపోని, ఓటమికి బెదిరిపోని ధైర్యమిస్తూ
సెలవడిగింది కనీటిచుక్క!!

క్రొత్త అమ్మని కనుగొన్న నీకు...

కూడలిలో ఉన్నాము
కలవని దారులెంచుకున్నాము
నీ దారిటు
నా దారటు
జాగ్రత్త తమ్ముడూ!!
ముళ్ళ దారులుంటాయి
భవిష్యత్తు బంగారు చేస్తాననే
జిత్తులమారి నక్కలున్నాయి
అధికారం మరిగిన మృగాలు పొంచివున్నాయి
కనిపించని మలుపుల్లో
కమ్ముకున్న కౄరత్వం
జాలి చూపదు
జోల పాడదు
ఉక్కు కౌగిళ్ళ మధ్య
ఉక్కిరి బిక్కిరి చేస్తాయి
నీ కలలకు సంకెళ్ళు వేస్తాయి
నీవు విడిపోవాలన్నావు
స్వతంత్రమే లేదా అన్నావు
అనూనయించాలని యత్నించా
కలిసుందామన్నా
నీ పటిమతో
ఉద్యమమై నెగ్గావు
నిన్ను నిలుపుకోలేనందుకు సిగ్గు పడుతున్నా
కన్నీటితో సాగనంపుతున్నా
మన జ్ఞాపకాలు
నిలువెత్తు చిత్రపటాలుగా
గుండెల్లో ముద్రించుకున్నా
కుంచిత భావాల పండితులూ
కలుపులే చూస్తున్న కవులూ 
పేగుబంధం తెలియని పెద్దమనుషులూ
చిలువలు పలువలుగా
అల్లుతుండవచ్చు మన బంధాన్ని
జాగ్రత్త తమ్ముడూ!!
క్రొత్త అమ్మని కనుగొన్న నీకు
తెలుసోలేదో మరి
అమ్మ మౌనంగా రోధిస్తోంది
చిదిరిన సీమలవైపు చూసి
చెరగని నెత్తుటి సంతకాలవైపు చూసి
భువన భవనమ్ములు నేను కాంక్షించలేదు
నిధులు వజ్రవైఢూర్యాలు కోరనూలేదు
నిన్ను దోచి నేను ఎదగాలని ఎదురుచూడలేదు
తీయని అనురాగపు చెట్టు నీడలో కలిసుందామనుకున్నా
తరతరాల తెలుగు ఖ్యాతిని కలిసి పంచుదామనుకున్నా 
శలవు మరి
నీకు జయమగుగాక
నీకు సకల విజయములందుగాక
అమ్మ నేర్పిందిదే
తెలుగమ్మ నేర్పిందిదే

చైతన్యం మాలో లేదు

రైతును దోచేసి
కష్టం కాజేసి
కాష్టం రగిలించి
భూమిని పెకిలించి
ఖనిజం అమ్మేసి
గోతులు త్రవ్వేసి
గనులను ఖాళి చేసేసి
అడ్డమైన దారుల్లో
ఎన్ని అవినీతి
క్రతువులు నిర్వహిస్తావ్
అదుపులేని మదుపులేని
ధన ప్రవాహపు
ఒరవడిలో
ఎన్ని భవంతులు
నిర్మిస్తావ్
ఎన్ని పరిశ్రమలు
ఆక్రమిస్తావ్
కళ్ళారా ఇన్ని చూసి
ఇంకా చవి చూస్తున్న
ఈ గొఱ్ఱెల్ని
మంద బుఱ్ఱల్ని
మరింత దోచెయ్
మొత్తంగా అమ్మెయ్
చైతన్యం మాలో లేదు
నూతనత్వం మాకు వద్దు
మేమిలానే బ్రతుకుతాం
జీవఛ్చవాలై మిగులుతాం

శ్రమజీవికితోడై నీవుండాలి

ఏ పరిశ్రమ శ్రమజీవి లేక
పనికి ఉపక్రమించింది?
ఏ కట్టడం శ్రమజీవి లేక
నిర్మాణం జరిగింది?
ఏ క్రొత్త ఆవిర్భావం
శ్రమజీవి లేక
ఈ ప్రపంచంలో అడుగెట్టింది?
ఏ అద్భుతమైన కల
శ్రమజీవి లేక
సాకారమై మన ఎదుట నిలిచింది?
ఏ శ్రమ
దొపిడిలేకుండా సాగింది?
ఏ శ్రమ
బెత్తంపట్టిన పెత్తందార్ల చేతిలో
కీలుబొమ్మయ్యింది?
నీవు విప్లవమంటూ
ఎర్రగుడ్డ తలకుగట్టి
తుపాకీ చేతబట్టి
అడవికి పరిగెట్టితే
ఈ బడుగుజీవి అరణ్యరోదన
పట్టణాలలో అనామకవేదన
ఎవరు తీరుస్తారు?
జాగృతి లేని జనం మధ్య
ఈ కట్టడాల వనం మధ్య
నిలిచి నిలువరించి
పోరాడు 
పడగలెత్తిన దౌర్జన్యపు
మిడిసిపాటును వడిసిపట్టి
నేలకేసి కొట్టి కొట్టి
మదపు పొట్టు తొలచి ఒలిచి
తెట్టు తేలిన స్వార్థాన్ని
తూట్లు తూట్లు పొడిచి పొడిచి
వెగటు పుట్టిన ఈ వ్యవస్థ
పుట్టల్ని పగులగొట్టి
నాజూకు పేర్లతో క్రొత్తబడిన
వెట్టి చాకిరిని
కత్తివేటుకు బలియిచ్చి
శ్రమజీవికితోడై నీవుండాలి
శ్రమజీవివై ప్రజాస్వామ్యాన్ని
మెప్పించాలి
--------------------
కార్మికదినోత్సవ శుభాకాంక్షలు

మేమూ చమటోడుస్తాం

అమ్మెయ్యి సహజ వనరులు
కాజేయి ప్రకృతి వరములు
దోచెయ్యి ప్రజల ఆస్తుల్ని
దాచెయ్యి కుళ్ళిన వ్యవస్థని
విమర్శకులపై ఎదురు దాడి చేసెయ్ 
ఇంకా విరమించకుంటే
ఈ ప్రపంచం నుండే లేపెయ్
చంపూ నరుకూ అంటూ రక్తపుటేరులు పారిస్తూ
మేమూ చమటోడుస్తాం
ముందడుగుకై యత్నిస్తాం
ఐదేండ్లకొకసారి ఎదోపోనీలే అని
ముద్దేస్తూ ముద్దుచేస్తే
అది కావలిదికావాలంటూ
కోరికలు కోరుతారు
కరువంటూ బతుకు బరువంటూ
వెంటపడిపొతారు
ఐదునూర్లు నొక్కేసి నెయ్యి బువ్వ బొక్కేసి
సారా కుమ్మేసి 
జేబుకు చిల్లుపెట్టించి మరీ పదవిస్తారు
పైరవీలు చేయమంటారు
అనుగ్రహ పత్రాలు కావాలంటారు
ఆగ్రహమొస్తే ఇల్లూ వాహనాలు కాల్చేస్తారు
మరి ఆ ఖర్చులన్నీ వడ్డీలన్నీ ఎవరిస్తారు
అందుకే శిస్తు డబ్బు కాస్త నొక్కేసి
ప్రభుత్వ భూముల్ని కొంచెం మింగేసి
నిధుల్లో అరాకొరా మళ్ళిస్తే
పతాక శీర్షికలకెక్కిస్తారు
మళ్ళీ ఎంతో కష్టపడి
జనాలదారి మళ్ళించి పదవి పొందేస్తాం
మా కష్టం తెలిసిందా
మా నష్టం ఎరుకైందా
మీరే మాకు అండా దండా
మీరే మాకు ఉన్నదంతా
మిమ్మల్నే మాయ చేయాలి
మిమ్మల్నే ముద్దు చేయాలి
అప్పుడప్పుడూ పావులా వాడుకుంటాం
ఎప్పుడో ఒకప్పుడు కరివేపాకులా తీసేస్తాం
మాయ మాటలు నమ్మి
అందలమెక్కించినంత కాలం
మేము మేస్తూనేవుంటాము
మీపై ఊరేగుతుంటాము
తప్పదు భరించాలి మరి
తప్పితే మిమ్మల్ని ఎలా వంచించాలో తెలుసుమరి

నీ ముంగిట అరుదెంచినంతనే

ఇన్ని మాసములు వేచి
ఎన్ని విరహముల దాచి
వర్ణనలకు వర్ణములద్ది
వేదనలను సాగనంపి
వలపుల తలపులకు తలుపులు తెరిచి
నీ ముంగిట అరుదెంచినంతనే
చెలిని గాంచిన దిగ్భ్రమలో
నిచ్చేష్టుడనైతిని
నీ కనుచూపు బాణాలు
నా యొంక సంధించినంతనే
మధువు గ్రోలిన మత్తు కమ్ముచున్నది
వేల వేణువులు నన్నలరించినట్లు
మధురముగానున్నది
ఘల్లు మన్న నీ మువ్వల సవ్వడి
ఝల్లు మన్న నాయెద లయలొ
వంత పాడుచున్నది
దశాబ్దాలనుండి రాయిగనున్న
మనసేదో రాగాలు నేర్చినట్లున్నది
మాటలకందని సందేశమేదో
నీ కంటి పాపలో దాగున్నది
చూపులు కలిపి మధురోహల మధువు కొంచెం మరీ కలిపి
వాకిటనున్న ఈ బాటసారికి అందించవా!
అలసిసొలసి, ఊహలను శ్వాశించి, జీర్ణించిన 
ఈ మనసుకు 
నిరీక్షణ శృంఖలాలు త్రెంచి 
నీ పరిష్వంగంలో లాలించవా !! 

వసంతం ఎప్పటిలాగే నీతో కలిసే వస్తుంది

రా ఆడుకుందాం!
రా పాపా ఆడుకుందాం!!
ఏం ఎందుకురావు?
దాచిన బొమ్మలు ఇచ్చేస్తా
పుల్లటి రేగుపళ్ళు కొనిస్తా
వగరు జామకాయలు కోసిస్తా
బంకమట్టి ఎడ్లబండి చేసిస్తా
పిలిచినప్పుడేమో రావు
వంద కారణాలు వినిపిస్తావు
నీ దారికే రావాలంటావు
ఉడికి ఉడికి నేను నాలుగు అంటిస్తాను
అలిగి నీవు దుప్పటి కప్పేస్తావు
ముక్కు చీదేస్తావు
ఇంతలో అమ్మ పిలుస్తుంది
నా వీపు మోత మ్రోగిస్తుంది
చెల్లినేడ్పిస్తావా?
బంగారు తల్లినేడ్పిస్తావా??
అంటూ మొటిక్కాయలేస్తుంది
నీపై మురిపాలు కురిపిస్తుంది
రాక్షసిలా నా బొమ్మలు విరిచేశావు
గవ్వలన్నీ పారేసావు
నేను కొన్నదంతా కావాలంటావు
నిన్ను చూస్తే...
నమిలి మింగేస్తామనిపిస్తుంది
ముక్కు కోయాలనిపిస్తుంది
నీ భుజం డప్పులాగ వాయించాలనిపిస్తుంది
ఆరెరె..ఇదేంటి కన్నీరొచ్చేస్తూంది
ఒక్కొక్క చుక్కా రాలి నీ చిత్రంపై పడుతోంది
ఇప్పుడే మెట్టినింట అడుగుపెట్టినట్లుంది
అప్పుడే రెండు మొగ్గలు పూచాయా!!
క్రొత బంధాలు తీవెలై నిన్ను అల్లుకున్నాయా!?
ఇద్దరు చిన్నారులు ముద్దులిచ్చే నీ చిత్రం
చాలా బావుంది
నాకెప్పుడూ మనల్నే గుర్తుకు తెస్తుంది
అన్నగా బాధ్యత నిర్వర్తించానో లేదో
మరచేపోయాను 
నీతో పోట్లాటలోనే బాల్యం గడిపేశాను
ఈ సంవత్సరం మళ్ళీ ఉగాది వస్తుంది
వసంతం ఎప్పటిలాగే నీతో కలిసే వస్తుంది
నీ రాకతో మా ఇంటికి పండుగనేతెస్తుంది

జ్ఞాపకాల్ని నిదురలేపితే

జ్ఞాపకాల్ని నిదురలేపితే
అమావాస్య ఆకాశంలో అనంతకోటి తారలల్లె
కనువిందుచేస్తున్నాయి
వెదికి వెదికి పట్టిన మిణుగురులన్నీ
ఎగిరిపోతున్నట్లు
రంగు రంగుల గోళీలన్నీ
చిన్నారి చేతినుండి జారిపోతున్నట్లు
అందకుండా కదిలిపోతున్నాయి
ఏ జ్ఞాపకాన్ని పలుకరించాలో 
తెలియక మనసు మూగవోతూంది
తెలివి మౌనం వహిస్తోంది
వెలికి రానంటున్న మరికొన్ని
అలిగిన పాపలై దాగుడు మూతలాడేస్తున్నాయి
గొంగళి పురుగు సీతాకోక చిలుకైనట్లు
మరికొన్ని చేదు అనుభవాలు
తీపి జ్ఞాపకాలుగా మెరుగయ్యయి
వెలగని మతాబులై మరికొన్ని
మనసులో నుండి మరుగయ్యయి
నిండు వసంతంలాంటి కొన్ని జ్ఞాపకాలు
కలలై వెంబడిస్తున్నాయి
దోసిట్లో నిలువని నీరై
మరికొన్ని జారిపోతున్నాయి
వెయ్యేండ్లైనా చెరిగిపోని తాళపత్రమై 
నీ జ్ఞాపకాలు మది అడుగున
పదిలమై వున్నాయి
చలిలో నులివెచ్చని దుప్పటి కప్పినట్లు
ఒంటరి ప్రయాణంలో ఒక తోడు కలిసినట్లు
ధారలౌతున్న కన్నీటిలో
ప్రపంచమంతా శూన్యమైనపుడు
నేను తోడంటూ చేయి అందించిన
నీ జ్ఞాపకాలు ఎపుడూ వెంటున్నాయి
అప్పుడప్పుడూ గతం తాలూకు జ్ఞాపకాలు తిరగేస్తాను
నేను ఎవరన్న నిజం నెమరేస్తాను
జ్ఞాపకాల పుటల్లొ మరో సశేషం చేరుస్తాను

దొరతనమణచ ఎయ్ దరువెయ్

ఎయ్ దరువెయ్
దుమ్ముపట్టి ధూళిపట్టి
నిమ్మకు నీరెత్తని తొత్తుగాళ్ళ
ఈ పొత్తుగాళ్ళ
రాక్షస రాజకీయ
నాయకుల పాలకుల
వూడ్చివేయ పూడ్చివేయ
ఎయ్ దరువెయ్!!

పొగరుతో ఒగరుతో
జనాలను గుమ్మపు జంతువులుగ
గుప్పెట బంధించిన
నేరగాళ్ళ నేతగాళ్ళ
దొరతనమణచ
ఎయ్ దరువెయ్!!

ఎకరాలకు ఎకరాలు
బొక్కెటోళ్ళ పుక్కెటోళ్ళ
డబ్బుల జబ్బుపట్టి
గబ్బుగొట్టె
మోసగాళ్ళ దొంగకోళ్ళ
పూసలదరగొట్ట బెదరగొట్ట
ఎయ్ దరువెయ్!!

కష్టాల్లో కరవులో
అలో లక్ష్మణా అని మేముంటె
లంచమంటూ పంచమంటూ
కడుపు మాడగొట్టె
ఈ కలుపుగళ్ళ కైపుగాళ్ళ
తరిమిగొట్ట తురుముపట్ట
ఎయ్ దరువెయ్!!

గొంతెండి
పొలమెండి
గుండెమండి పోతుంటె
నీటి రాజకీయలతొ
నీఛ రాజకీయాలతొ
ఇంటి ఈతకొలను లో 

పబ్బం గడుపు

వడుపుగాళ్ళ ఏపుడుగాళ్ళ
గుండెలదర
కూసమదర
ఎయ్ దరువెయ్!!

నీకెప్పటికీ నిజం కాను

ఎక్కుపెట్టిన విల్లునై నేను
లక్ష్యం చేరకుండానే లౌక్యంతో
సంభాషిస్తాను, లౌకికత్వంతో పయనిస్తాను
విలుకాని వెన్ను విరుస్తాను
నమ్మకాన్ని వమ్ము చేస్తాను
అందుకే నేను నిజం కాను
దర్పణంలో ద్వయం నేను
సామాన్య జీవనపు గరళం మ్రింగిన నేను
చిరునవ్వుల వెనుక విషపు కోరలు దాచగలను
నీవెదురైనప్పుడు నెవ్వెరపోయే ప్రేమ చూపిస్తాను
దూరమున్నపుడు నమ్మలేని మౌనమౌతాను, తత్వానికి దొరకను
నేనందుకే నిజం కాను
వెనుతిరిగి చూసుకుంటే నీ తీపి గురుతులలో నేను
మున్ముందు ఈ ఒరవడి కొనసాగుతుందని నమ్మించలేను
ఇప్పటికిప్పుడు తెరలమాటున మాయమయ్యే నేను
నీకెప్పటికీ నిజం కాను
పదునైన అభిప్రాయాలు పంచుకునే నేను
తరచి చూస్తే ఎపుడూ పాటించను
ఒకింత అబద్ధం
ఒకింత స్వార్థం
ఒకింత పైత్యం
ఒకింత స్నెహం
ఎక్కడో కొంత ప్రేమ
మరింత చపలత్వం
కలగలిసిన నేను
నీకెప్పటికీ నిజం కాను

ఐదు సంవత్సరాల ఊడిగం

ఎన్నికలో ఎన్నికలు
ఎన్ని కలల ఎన్నికలు
కల్లి బొల్లి హామీల ఎన్నికలు
కలుగులో దూరిన ఎలుకల్లా బయటకొచ్చే ఏలికలు!!
కుంగిన గుండె పై ప్రేమపూతలు 
ముద్దుల ఒలకబోతలు
వంగి వంగి నమస్కారాలు
వేల వేల న "మస్కా"రాలు
నేతల నోట చిలుకపలుకులు
బక్క చిక్కిన ముక్కి మనిషిని ఆత్మబంధువని కౌగిలించే నేతలు!!
మందుల వరదై పారే ఎన్నికలు
గొర్రెల మందలా మారే ప్రజలు
ఎన్నుకున్న ప్రజలు మూర్ఖులపాలు 
ఎందుకన్నవారు తన్నులపాలు
ప్రజస్వామ్యం మళ్ళీ మళ్ళీ నగవుల పాలు
మరణించిన వారు సైతం పాల్గొనే ఎన్నికలు
ఎవరు నకిలీయో తెలియని ఎన్నికలు
"నల్ల" నగదు బదిలీ ఎన్నికలు
ఐదు సంవత్సరాల ఊడిగంకై సమర్పించే సంపూర్ణాంగీకారం ఎన్నికలు!!

అదిగో వచ్చేదే మా ఊరు

అదిగో వచ్చేదే మా ఊరు
పేడ కళ్ళాపి చల్లిన ముంగిళ్ళు
ముంగిళ్ళలో తీర్చిదిద్దిన రంగవల్లికలు
రంగవల్లికల మధ్యలో గొబ్బెమ్మలు
గొబ్బెమ్మలపై గుమ్మడిపూలు
గడపగడపకి మామిడి తొరణాలు
పసుపు గడపల బంగారు ధగధగలు
చిరునవ్వుల పలుకరింతలు
దూరం పెరిగిన స్నేహాల తీపి కలయికలు
చిరు మందహసం చేస్తున్న బుర్ర మీసాలు
భుజం తట్టి పలుకరిస్తున్న సమ వయస్కులు
క్రొత బట్టల్లో పరుగులెడుతున్న చిన్నపిల్లలు
అవి.... సంవత్సరాలనాటి జ్ఞాపకాలు
ఇప్పుడేమో ఊరు పెరిగింది
మనుషుల మధ్య దూరం ఇంకా పెరిగింది
పలుకరింపులు దూరవాణికి పరిమితమయ్యాయి
పండుగలు దూరదర్శన్ కి కార్యక్రమాలయ్యాయి
ఊరికెళ్తే పోయినదేదో
వెదుకుతున్నట్టు
దొరికినదేదో
మనదికానట్టు
రంగులకలలేవో
ఛిద్రమైనట్టూ
నిజాల నిప్పురవ్వలు
గుండెను తాకుతున్నాయి

బంధం విలువ

నవ్వుకు
పువ్వుకు
తావికి
అల్లుకున్న బంధం విలువ తెలుసు
కడవకు
పడవకు
గొడుగుకు
నీవులేక నేనులేనన్న
అనుబంధం విలువ తెలుసు
చెలిమికి
బలిమికి
కలిమికి
వీడినప్పుడు మాత్రమే
మనసుల విలువ తెలుసు
వేకువకు
వెలుగుకు
వెన్నెలకు
చిగురిస్తున్న ఆశల 
నూతన బంధం విలువ తెలుసు

చరిత్ర పుటలపై నీ సంతకం

ఎండలో కరుగుతున్న మంచు ముక్కలాగా
పిడికిళ్ళ నుండి జారిపొయే ఇసుకలా
కళ్ళు మూసి తెరిచేంతలో
కాలం కరిగిపోతున్నది
వెలకట్టలేనిదై చెజారి పొతూంది
ఎవరి కోసం ఆగనంటూ
ఎందుకోసం అగాలంటూ
వెనక్కి తిరిగి చూసుకుంటే
పుట్టిన రొజులెన్నో గడచిపొయాయి
వగచిన రొజులన్నీ మిగిలిపొయాయి
నిముషం నిముషం
నిదురలొనే జోగితే
కలతల్లోనే మిగిలితే
ఇరవై లో అనుకున్నవి
అరవై లో చేయలవా?
మళ్ళీ చేద్దామంటూ
మతిమరపు పేరు చెప్పి
విధివ్రాత పేరు చెప్పి
సమయం కరిగించకు
నీ విలువను తరిగించకు
కాలు చేయి ఆడనివారు
అలుపెరుగక శ్రమిస్తున్నారు
ప్రపంచ ప్రఖ్యాతి పొందుతున్నారు
నీవెందుకు అందులో అంతో ఇంతో కొంతో
సాధించలేవు?
కాలం నిన్ను శాసింపక ముందే
నీవు ప్రణాళిక రచించు
చరిత్ర పుటలపై నీ సంతకం లిఖించు

ఆకాశంలో సగం ఎక్కడ?

ప్రేమ పంచడం తెలియక
మనసు గెలవటం తలంచక
అర్థం చేసుకుని ఆరాధించలేక
మూర్ఖంగా ఆస్వాదించాలనుకున్నారు
క్షణికపు కోర్కెలతో 
పైశాచికత్వం దుర్మార్గత్వం కలబోసిన
జుగుప్సాకరమైన దారులెన్నుకున్నారు
ఆమ్ల దాడులు, అకృత్యాలు, అపహరణలు
నిర్వచింపలేని అపరాధాలతో
ప్రకృతిని శాసించామనుకొంటున్నారు
నీచప్రవృత్తిని భరించమంటున్నారు
ఆకాశంలో సగం ఎక్కడ, భూమిపై విలువే లేదిక్కడ
ప్రకృతి తిరగబడితే
ప్రపంచం నాశనమే
విశృంఖల బేహారులకు మరణశాసనమే
కామ ప్రకోపకుల మధాంధ తత్వాన్ని
అణచటానికి ఈ స్నిగ్ధ మనోహర సౌందర్యమే
శక్తిస్వరూపిణియై మృగతృష్ణను
కడతేరుస్తుంది, కాలరాస్తుంది
ప్రకృతే తనను తాను మలచుకొంటూ
ఓ విప్లవంగానో
ఓ విధ్వంసంగానో
ఓ సంఘటిత శక్తిగానో 
జీవుల సమతుల్యత పరిరక్షిస్తుంది

ఇది నిత్య సత్యం

ఇది సత్య కృత్యం

తరతరాలకు తెలుగు వెలుగు

పరభాషా ఒరవడిలో
తెలుగు తృణీకరింప
మనసేల ఒప్పుచున్నది
మాతృ భాష మన కంఠమ్ము వీడ
ఉనికి కోల్పోయి మూలమ్మున్గోల్పోయి
తెగిన గాలిపటమ్ము వలె 
జాతి బోవుచుండ మిన్నకుంటిమి
వంశ పారంపర్యముగ 
తెలుగు నాదరించువారు 
తరిగిపోగా
భాష మూగవోతున్నది
భావితరాలకు మరుగుకానున్నది
మాతృ భాష మధురమైన భాష 
లోకులెల్ల కొనియాడిన భాష
కథల్ కావ్యముల్
కీర్తనల్ శతకమ్ములు పురాణమ్ములు పండించిన భాష
జాతి జీవ నాడి యైన భాష
ఇట్లు రాలిపోవ తగునా
ఇట్లు అక్షర క్షరమగుట క్షమార్హమౌనా
ఆస్వాదించినన్ అరాదించినన్ 
నివేదించినన్ విభేదించినన్  
కీర్తించినన్ ప్రార్థించినన్ 
చక్కగ నొదుగు భాష తెలుగు భాష

కన్న బిడ్డ వలె కంటిపాప వలె

వెలకట్టలేని వజ్రం వలె
వేయి జన్మల ఫలము వలె
తెనుగును కాపాడుకోవలె
జాతి నొక్కటిగ నుంచు తెలుగు భాష
సంస్కృతి శాశ్వతమై నుంచు మన మాతృ భాష
భాషలోన భావమున్నది
భావములోన బంధమున్నది
బంధములోన భవితయున్నది
భవితలోన సౌభాగ్యమున్నది
భావ బంధ భవిత సౌభాగ్యముల 
పరివృత్తమై భాష యున్నది
వారధిగా మనమున్నాము
తెలుగు వెలుగును తరతరాలకు అందిద్దాం